Oblys ortalyǵyndaǵy Aqan seri atyndaǵy joǵary mádenıet kolledji halqymyzdyń birtýar perzenti, aqyn, ánshi-kompozıtor Aqan seri Qoramsaulynyń týǵanyna 180 jyl tolýyna oraı respýblıkalyq dástúrli ánshiler baıqaýyn ótkizdi.
Aqan seri Qoramsaulynyń 180 jyldyǵyna oraı uıymdastyrylǵan respýblıkalyq dástúrli ánshiler baıqaýyna qazaq dalasynyń bar qıyrynan dámeli ánshiler jınaldy. Olar jas ereksheligine qaraı úsh topqa bólindi. Ár toptyń úzdikteri arnaıy marapattarǵa ıe bolsa, sonymen birge, «Qulager», «Mańmańger», «Maıda qońyr», «Balqadısha» syndy arnaıy júldeler taǵaıyndaldy.
Oblystyq mádenıet jáne bilim basqarmalarynyń demeýimen ótken respýblıkalyq án dodasy dástúrli án ónerin damytýdy, arydaǵy arýaqty atalarymyzdyń ulttyq ónerimizge qosqan ólsheýsiz eńbegin nasıhattaýdy murat tutqandyǵyn sóz arasynda synalap aıta ketken jón. Árıne, jaýapty jumystyń túpqazyǵyn ustaǵan Aqan seri atyndaǵy joǵary mádenıet kolledji. Jınaqtap aıtqanda, Aqan seriniń esimi berilgen oqý orny men Ybyraı Altynsarın atyndaǵy tósbelginiń ıegeri, kolledj dırektory Quralaı Ydyrysovanyń eńbegi zor.
– Elimizdiń tus-tusynan Aqannyń ánin áýeletip jetken órimdeı jastar kóńilge qýanysh syılap, ólmes ánniń erteńin elestetti. On ekige endi tolǵan jas ánshilerdiń balǵyn daýystary babyna jetken jıyrma bestegi ánshilerdiń zaldy kernegen daýystarymen birtindep baýrap aldy. Árıne, Arqanyń asqaq ánin, ıirimi mol, myń qubylǵan Aqannyń ánin sheber oryndaý jas ánshi úshin ońaı emes. Degenmen, baıqaýǵa túsken qyryq shaqty ánshiniń ishinen ozyp shyǵyp, gala-konsertke qatysqan órimdeı órenderdiń talaby taýdaı eken, – dedi zerdeli kórermenniń biri Maral Jaqypova. – Seriniń ánin maıtalman kásibı ánshilerdiń oryndaýynda qulaq quryshyn qandyra tyńdap úırengen kórermen retinde meni keshegi jastardyń salǵan áni sol aqqý sazdy, gákký nazdy áýenderdiń úzilmegenimen, jasampazdyǵymen qýantty.
Án baıqaýy aıryqsha tartysty ótti. Eń bastysy, óner ıelerine, kıeli soqpaqqa túsken jastarǵa qııanat jasalǵan joq. Barynsha ádil baǵa berildi. Sondyqtan da ókpelegen eshkim bolmady. Bul da úlken jetistik. Ánsheıinde ónerli ortada aragidik kezdesip qalatyn jat kórinis oryn almady.
12-15 jastaǵy talapkerler arasynda bas júldege Astana qalasyndaǵy Qazaq ulttyq óner ýnıversıteti janyndaǵy kolledjdiń bilim alýshysy Ińkár Núpteke ıe boldy. Birinshi oryn Astana qalasyndaǵy Roza Baǵlanova atyndaǵy №2 bilim oshaǵynyń oqýshysy Tomırıs Ramazanǵa buıyrdy. 16-19 jastaǵy jasóspirimder arasyndaǵy dodada bas júldeni Astana qalasyndaǵy Qazaq ulttyq óner ýnıversıteti janyndaǵy kolledjdiń bilim alýshysy Madethan Aıdyn aldy. Birinshi orynǵa Aqan seri atyndaǵy joǵary mádenıet kolledjiniń ókili Álbosyn Tańnur kóterildi.
Kelesi topta bas júldege Qaraǵandy oblysynyń Buqar jyraý aýdanynan kelgen jas ánshi Qýandyq Tókenov laıyqty dep tanyldy. «Mańmańger» atalymyna Almaty qalasyndaǵy P.I.Chaıkovskıı atyndaǵy mýzykalyq kolledjdiń bilim alýshysy Danııar Nurmoldaev, «Balqadısha» atalymyna Astana qalasyndaǵy Qazaq ulttyq óner ýnıversıteti janyndaǵy kolledjdiń bilim alýshysy Gaýhar Halyq, «Maıda qońyr» atalymyna Ulytaý oblysynyń Jezqazǵan mýzykalyq kolledjiniń bilim alýshysy Azamat Nurǵalıuly, «Maqpal» atalymyna Pavlodar oblysy Ekibastuz qalasyndaǵy Estaı atyndaǵy balalar mýzykalyq mektebiniń ókili Agılıa Tavleteeva, «Qulager» atalymy boıynsha Soltústik Qazaqstan oblysyndaǵy Ermek Serkebaev atyndaǵy óner kolledjiniń bilim alýshysy Murat Qajken ıe boldy.
KО́KShETAÝ