Saryózek garnızonyna qarasty áskerı bólimniń tarıhy tereń. 1945 jyly 372-Qyzyl týly motoatqyshtar dıvızııasynyń quramynda 21-jeke tank batalony bolyp qurylǵan. 1955 jyly batalon 301-tankilik polk mártebesin ıelenedi. Keıinnen 1966 jyly Saryózek aýylyna kóshirilgen garnızon búginde elimizdiń Qarýly Kúshterinde eń bedeldi áskerı bólim sanalady.
Elimizde osyndaı onǵa jýyq úlkendi-kishili garnızon bar desek, jaýyngerlik tapsyrmasy boıynsha betke tutar brıgadanyń biri – 12740 áskerı bólimi. Garnızonda barlyq jaǵdaı jasalǵan, áskerıler turǵyn úımen qamtamasyz etiledi. Jalaqysy joǵary. Sondyqtan azamattardy áskerge kelisimshartpen qyzmet etýge shaqyrady. Áskerı bólim komandıriniń tárbıe jáne ıdeologııalyq jumystar jónindegi orynbasary, podpolkovnık Nurǵalı Aqylbaevtyń aıtýynsha, munda qazirgi tańda 1500-den astam áskerı qyzmetker bar. Olardyń 600-den astamy jylyna 2 ret, jaz ben kúzde shaqyrylyp, azamattyq boryshyn ótep jatqan merzimdi áskerı qyzmetker. Qalǵan myńǵa jýyq áskerıdi ofıser men kelisimshartpen jumys isteıtin maman quraıdy.
Qazir joǵary synyp oqýshylaryna patrıottyq tárbıe berý isi jolǵa qoıylǵan. Soǵan oraı áskerı bólimniń mamandary Kerbulaq aýdanyndaǵy orta mektepterge arnaıy baryp, kezdesýler uıymdastyrady. Onda otanshyldyq pen týǵan jerdi qorǵaýdyń mańyzdylyǵy túsindirilip, azamattyq boryshyn ótep, áskerı qyzmetten ótken jastardyń joǵary oqý oryndaryna túsetini aıtylady.
«Bul sheshim Qorǵanys mınıstrligi men joǵary oqý oryndarymen jasalǵan memorandým negizinde qolǵa alynyp keledi. Mine, osyndaı jumystardyń arqasynda elimizdi qorǵaý isine qushtarlyq tanytyp otyrǵan jastardyń qatary kóbeıgen, – degen podpolkovnık Nurǵalı Aqylbaev garnızonnyń ereksheligin atap ótti. – Sonymen qatar aýdan mektepterindegi 10-11-synyp oqýshylary 12740 áskerı bólimine arnaıy kelip, áskerı ómirmen tanysyp turady. Jaqynda ǵana «Ashyq esik kúnine» kelgen «Alǵashqy áskerı daıyndyq» pániniń oqýshylary kazarmaǵa kirip, jaýyngerlerdiń jatar ornyn, ashanasyn, daıyndyq sabaqtary ótetin kabınetterdi, qarý-jaraqty, qural-jabdyqty, áskerı tehnıka men transportty tamashalady. Bizge keletin jastardyń basym bóliginiń boıynan otansúıgishtikti, áskerı ómirge degen qulshynys pen talpynysty baıqaýǵa bolady. Tipti azamattyq boryshyn atqarýǵa degen umtylystary erekshe».
Elimizde áskerge shaqyrýdyń kóktemgi naýqany bastalǵaly beri Kerbulaq aýdandyq qorǵanys isteri jónindegi bóliminde azamattardy áskerı qyzmetke shaqyrý jumystary qyzý júrip keledi. Búginde birqatar azamatty ásker qataryna shyǵaryp saldy. Buǵan deıin birtalaı bozbala azamattyq boryshyn oıdaǵydaı ótep, tipti alǵashqy legi Ulttyq qaýipsizdik komıtetiniń shekara qyzmeti jáne Ulttyq ulan sapyna joldanǵan.
«Bul rásim biz úshin erekshe sát. Medısınalyq zertteýlerden ótip, iriktelip alynǵan jastar áskerge attandy. Endi Qazaqstan Qarýly Kúshteriniń áskerı qurylym bólimderinde merzimdik áskerı boryshyn óteıdi. Bolashaq sarbazdardy shyǵaryp salýǵa olardyń ata-analary men týysqandary qatysyp, Otan qorǵaýshy uldaryna óz lebizderin bildirip, sát-sapar tiledi», deıdi Saryózek garnızony baspasóz qyzmetiniń bastyǵy, maıor Abzal Sartaev.
Onyń aıtýynsha, búgingi tańda atalǵan áskerı bólimniń jeke quramy jaýyngerlik dástúrdi ustana otyryp, jaýyngerlik ázirlikti udaıy shyńdap, qyraǵylyqpen jaýyngerlik mindetterin atqaryp, beıbit eldiń tynyshtyǵyn kúzetýde. Sondaı-aq aýdandaǵy orta mektepterdiń «Jas sarbaz» áskerı-patrıottyq qozǵalysynyń jumystaryna aralasyp, «Erlik sabaqtar» men «Ashyq esik» kúni sııaqty kóptegen is-shara ótkizip, áskerdiń tarıhyn, jaýyngerlik dástúrlerin nasıhattaý arqyly jastarǵa patrıottyq tárbıe berip keledi.
«Qazir áskerge barýǵa nıet bildirgen jastardyń qatary jyldan-jylǵa artyp keledi. Bul degen jaqsy jetistik. Qazir áskerge barǵan azamattarǵa birshama jeńildik bar. О́ıtkeni áskerge barǵandar Otan aldyndaǵy boryshyn ótep qana qoımaı, joǵary oqý oryndaryna túsýge mol múmkindik alady. Ásker qatarynda qyzmet etip, Otan aldyndaǵy paryzyn óteýge árbir azamat mindetti, sebebi týǵan jerdi, eldi, atamekendi qorǵaý – qasıetti borysh», dedi Kerbulaq aýdandyq qorǵanys isteri jónindegi bólim bastyǵy, podpolkovnık Bolat Omarov.
Jalpy, garnızon jyl saıyn bir top sarbazben qoshtasyp jatsa, artynan taǵy bir top jaspen tolyǵyp jatady. Bul – mundaǵy mamandar úshin úırenshikti oqıǵa. Kúni keshe dástúr boıynsha shabýyldaý brıgadasynda belgilengen qyzmetin abyroımen ótegen 200-den asa sarbazdy shyǵaryp salý rásimi ótti. Biz de atalǵan is-sharaǵa arnaıy baryp qatysyp, sarbazdarmen tildesip qaıttyq.
Osydan bir jyl ásker qataryna elimizdiń ár óńirinen shaqyrylǵan jaýyngerler bir mindetten quttylǵandaı keýdelerin erkin kóterip, Otanǵa degen sezimderin eseleı túskendeı jaıdary kóńil-kúıde. Olar bir jyl boıy áskerı mamandyqty meńgerip, jaýyngerlik daıarlyqta eleýli nátıjelerge qol jetkizgen. Sondaı-aq minezderin shyńdap, áskerı tártipti úırenip, komandada jumys isteýdi iske asyrdy. Zapasqa shyǵarylǵan sarbazdarǵa qurmet kórsetý is-sharasy áskerı bólimniń saptyq alańynda uıymdastyryldy. Oǵan BAQ ókilderinen bólek, áskerı qyzmetshiler men Qarýly Kúshterdiń ardagerleri qatysty.
Saltanatty jıynda brıgada komandıri, podpolkovnık Dáýlet Sekenov jeke quramdy mańyzdy is-sharamen quttyqtap, sóz sóıledi. Onyń aıtýynsha, zapasqa shyǵarylǵan sarbazdar bir jyl ishinde egemen elimizdiń tynyshtyǵy men qorǵanysyn qamtamasyz etip, tutastyǵyn saqtaýǵa óz úlesterin qosqan. Osy úshin arnaıy alǵysyn da bildirdi. Sonymen qatar jaýyngerlik daıarlyq kezinde joǵary kórsetkishterge qol jetkizgen eń úzdik sarbazdar maqtaý qaǵazdary jáne alǵyshattarmen marapattaldy. Tipti jaýyngerlerdiń ata-analaryna da alǵys hattar joldandy. Is-shara barysynda sarbazdar saptyq adymmen ortaǵa shyǵyp, bólimniń jaýyngerlik týymen qoshtasty. Olarǵa bir jyldyń kólemindegi áskerı is-sharalar men oqý-jattyǵýlarynan estelik retinde fotoalbomdar taratyldy. Birqatar úzdik sarbazǵa arnaıy daıyndalǵan tý astyndaǵy fotosýretter saltanatty túrde tabys etildi.
«Mine búgin bir jyldyq áskerı qyzmetimiz aıaqtaldy. Biz Otan aldyndaǵy boryshymyzdy abyroımen atqardyq dep sanaımyn. Bizdi joǵary jaýyngerlik daıarlyq pen áskerı tártipke úıretip, árqashan qoldaý kórsetken ofıserler men serjanttarǵa aıtar alǵysym mol. Bolashaq jastardy Otan aldyndaǵy mindetterin ótep, aıbyndy áskerimizde qyzmet etýge shaqyramyn», dedi áskerı boryshyn aıaqtaǵan sarbaz efreıtor Jandos Almasov.
Otan qorǵaý – árbir Qazaqstan azamatynyń qasıetti paryzy. О́zin azamatpyn dep sanaıtyn, keýdesinde ar-namysy, boıynda jigeri, júreginde oty bar árbir jan úshin bul eń basty mindet ekenin umytpaǵan jón.
Jetisý oblysy