Qurylys alańyna aınalǵan óńir

Mesenat degennen shy­ǵa­dy, Panfılov jáne Kerbu­laq aýdandarynda áleýmettik osal top sanatyndaǵy 8 otbasy kóp­ten kútken baspanalaryna qol jetkizdi. Jomart jandar kúni keshe kópbalaly otbasyǵa, jal­ǵyz­­basty analarǵa jáne erekshe qa­­jettilikteri bar azamattarǵa pá­­ter kiltin tabystady.

О́ńir ákiminiń baspasóz qyzme­tiniń málimetine súıensek, Ker­bu­laq aýdanynyń Saryózek aýy­ly turǵyndaryna turǵyn úıdi «Jolbarys Agro» JShS bas quryltaıshysy Narymbet Ábdibaev, osy kásiporynnyń dırektory Maqash Áshirbekov jáne «LeaderNsk» JShS dırektory Nurbolat Kárimov satyp alyp bergen. Osylaısha, kásipker-mesenattardyń qoldaýynyń ná­tı­­­jesinde 4 otbasy­ kópten kút­ken jeke bas­pa­nasyna qol jetkizdi. Onyń 3-eýi 5-6 baladan tárbıelep otyrǵan kópbalaly otbasy. Al Panfılov aýda­nyn­daǵy 4 kópbalaly otbasy da qonys toıyn toılady. Olardyń 3-eýi – Jarkent qalasynyń jáne 1-eýi – Kishi Shyǵan aýylynyń turǵyndary.

Búginde Panfılov aýdanynda baspana kezeginde turǵan azamattardy turǵyn úımen qamtamasyz etý maqsatynda árqaısysy 60 páterlik 4 kópqabatty turǵyn úıdiń qurylysy júrgizilýde. Úılerdi jyl sońyna deıin tapsyrý josparlanǵan. Sondaı-aq árqaısysy 60 páterden turatyn 10 turǵyn úıdiń jobalyq-smeta­lyq qujattaryn ázirleýge jáne jeke turǵyn úı alqabyn daıyn­daý jumystaryna qarajat bólindi.

Jalpy, Jetisýda turǵyn úı máselesin sheshýde mesenattar da óz úlesterin qosýdy jalǵastyra beredi. Máselen, «Shymyr» JShS Tekeli, Úsharal jáne Aqsý aýdanynda úıler salyp beredi. Al kelesi jyly Úkimet qaýlysyna sáıkes «Samuryq-Qazyna» AQ Taldyqorǵan qalasynda 7 kóp­pá­terli, Panfılov aýdanynda 80 kóppáterli turǵyn úı jáne Sary­ózek­te 60 kottedj qu­ry­ly­syn bastaıdy.

Osy oraıda taǵy bir máseleniń sheti shyǵady, Taldyqorǵandaǵy qurylys nysandaryn oblys ákimi Beıbit Isabaev aralap, olardyń sapaly salynyp jatqandyǵyna kóz jetkizip qaıtty.

«Inklıýzıvti ádil qoǵam qurý – Memleket basshysynyń ma­ńyz­dy tapsyrmalarynyń biri. Salynyp jatqan úılerde erekshe qajettilikteri bar turǵyndardyń óz úılerine esh qıyndyqsyz kire alýy úshin yńǵaıly pandýstar, avtomatty kótergishter, taktıldi joldar bolýy kerek. Tek úı ǵana emes, barlyq jańa nysandardy salý kezinde merdigerlerge osy erejeni saqtaý talaby qoıylady. Úı­lerdiń syrtqy qasbeti qalanyń sáý­lettik kelbetine jáne estetı­ka­lyq talaptarǵa saı bol­ýy tıis», dedi oblys ákimi.

Máselen, 8-shaǵyn aýdan­da­ǵy eki kóppáterli úıdi «Shymyr» JShS merdigerlik uıymy eki jyl buryn aıaqtaǵan. Biraq abattandyrý problemalaryna baılanys­ty áli paıdalanýǵa berilmegen. Oǵan merdiger uıym «Monolıt» JShS-nyń jaýapsyzdyǵy sebep bolǵan. Bul rette qala ákimi Áset Masabaev: «Sot sheshimine sáıkes qurylys kompanııasy ınjenerlik jelilerdi salýdy aıaqtady, biraq aýlany abattandyrý jaǵynan taǵy da keshiktirip jatyr. Sonyń saldarynan kezekte turǵan 200-ge jýyq otbasy kópten kútken pá­ter­­leriniń kiltin ala almaı otyr», dep túsindirdi.

Al nysanǵa jaýaptylar, qar­jy­lyq problemalarǵa baı­lanys­ty aýlany asfalttaýdy sál kesh­te­tip bastaǵanyn aıtady. Abattandyrý jumysyn mamyr aıynyń sońyna deıin aıaq­talatynyna ýáde berdi. Son­daı-aq óńir basshysynyń tapsyrmasyna sáıkes óz qarajaty esebinen «Shymyr» JShS mer­diger kompanııasy osy úılerdiń kire­­beristerine avtomatty kóter­gish­ter ornatpaq.

«Búginde Taldyqorǵanda tur­ǵyn úı kezeginde 15 myńnan astam adam tirkelgen. Osy jylǵa jos­par­lanǵan turǵyn úı kólemin qam­tamasyz etýdiń arqasynda 1900-den astam adam nemese kezekte turǵandar sanynyń 12-13 pa­ıyzy baspanaǵa qol jetkizedi, bul – jaman kórsetkish emes. Biz bıýdjet qarajatyna úı salýdy jalǵastyramyz, mesenattar da qoldaý kórsetedi. Mysaly, «Shy­myr» JShS Tekeli, Úsh­aral qalalarynda, Aqsý aýdanyn­da úı turǵyzady. Al kelesi jyly «Samuryq-Qazyna» AQ Úki­met­tiń qaýlysyna sáıkes Tal­dy­qorǵanda 7 kóppáterli úı, Panfılov aýdanynda 80 pá­ter­li úı, Saryózekte 60 kottedj salýdy bastaıdy. Bul oblys halqynyń ómir súrý sapasyn jaqsartýǵa úlken kómek bo­lyp, qomaqty úles qospaq. Aldaǵy jyldary da turǵyn úı qury­ly­synyń osy qarqynyn saqtap qalýdy josparlap otyrmyz», dedi B.Isabaev.

Qazir óńir ortalyǵynda «Je­ti­sý» voleıbol klýbynyń jat­tyǵý bazasy men klýb qura­myn­­­da­ǵylarǵa arnalǵan turǵyn úı qu­rylysy da júrip jatyr. Naq­tylaı ketsek, joǵarǵy lıgada oınap júrgen «Jetisý» jáne «Aıqarakóz» voleıbol komandalary jattyǵatyn sport­tyq nysan 300 mln teńgege blokty-modýldi konstrýksııadan turǵyzylmaq. Qurylys jumystarymen «ASK Aýyl qurylysy» JShS aınalysýda. Munda oqý-jattyǵýǵa qa­jetti barlyq jaǵdaı qaras­ty­ryl­ǵan. Qazir qurylys alańynda qazanshuńqyr qazý jumystary júrip jatyr.

Al voleıbolshylarǵa arnalǵan turǵyn úı jeke ınvestordyń esebinen salynady. Merdiger mekeme «Merıdıan M.O.B company» kompanııasynyń ýchaske bas­tyǵy Áset Beretaevtyń aıtýyn­sha, munda qurylys júrgizýdiń bastapqy daıyndyq jumys­tary bitken, endi ǵımarat­tyń irgetasyn quıa bastaıdy. Bul jumystarǵa ázirge 20 adam tar­tyl­ǵan, keıin jumysshylar sany arta túsedi.

Ortalyq stadıonnyń qosal­qy alańynyń jańǵyrtý jumys­ta­ry­na da erekshe nazar aýdarǵan oblys ákimi «SMÝ Shyǵys» merdiger kom­panııasynyń ókili Madııar Tobyqbaevtan qurylystyń jaı-japsaryn surap bildi. Ýchaske bastyǵynyń sózine súıensek, jobanyń quny 1 mlrd teńgeden asady. Osy jobanyń aıasynda qosalqy stadıonnyń jasandy jabyny tolyq aýystyrylyp, kógaldyń astyna jylý tartylady, kórermender oryndyqtary jańalanady, qabyrǵasy sylanyp, boıalyp, retke keltiriledi. Sonymen qatar negizgi stadıonǵa kireberis aýmaqtyń jabyny ja­ńa­lanyp, asfalt pen tas tóse­meleri, jıektastary aýys­ty­rylady. Oıyn alańynyń aınalasyndaǵy jú­gi­rý jolaǵynyń da tósemi ja­ńar­­tylady. Alańnyń úsh bóli­gin­degi elektr jelileri aýystyrylyp, jańa baǵanalar qoıylady. Bul jumystar sáýir aıynda bas­­taldy. Bir sóz­ben aıtqanda, or­talyq stadıon ÝEFA stan­darttaryna saı jań­ǵyr­ty­la­dy. Oblys ákimi qury­lys ba­rysyndaǵy, materıal tań­daý­da­ǵy birqatar kem­shi­lik­ke na­zar aýdaryp, olarǵa qa­tys­ty óz usy­nys­ta­ryn jobaǵa engizýdi tap­syrdy.

Jýrnalıstermen tildesken oblys ákimi Beıbit Isabaev byltyr kúzde Jetisý óńirine jumys saparymen kelgende Memleket basshysy buqaralyq jáne kásibı sportty damytý jóninde birqatar tapsyrma bergenin atap ótti.

«Qazir biz arnaıy jer bólip, joǵarǵy lıgada oınap júrgen «Jetisý» men «Aıqarakóz» voleıbol komandalaryna arnaıy sporttyq alańdar salyp jatyrmyz. Endi bizdiń voleıbolshylarymyz oqý-jattyǵý jıyndarynyń bárin osy jerde ótkizedi. Jeke ınvestor óz qarjysyna klýb ujymyna turǵyn úı salýda. Bola­shaq­ta osy sporttyq bazanyń irge­sin keńeıtip, voleıbol akademııa­syn qursaq, sportta talantty jas­tarymyzdy ózimiz daıarlaýǵa úlken múmkindik bolady. Sol sııaqty regbıden, ındorhokkeıden respýblıkada úzdik komandalardyń qataryndaǵy bizdiń sportshylarǵa qysta jat­ty­ǵatyn jabyq keshendi BMK arqyly turǵyzyp beremiz. Qazir osy qurylystardyń bary­syn, sapasy men qarqynyn kó­rip shyqtym. Nysandar der kezin­de iske qosylýǵa tıis», dedi B.Isabaev.

Búginde Jetisýda nebir qury­lys nysandary boı kóterip jatyr. Onyń deni ınvestorlar men mese­nat­tardyń qarjysyna salynýda. Bul óńirde basqa salalardyń damýyna úlken járdem bolyp otyr.

Jetisý oblysy