Ulttyq arhıvte fılologııa ǵylymdarynyń doktory, professor Serik Negımovtiń «Kósem sózdiń kenshisi» atty jeke tek qorynyń ashylýy men Máskeýdegi «Hýdojestvennaıa lıteratýra» baspasynan jaryq kórgen «Málik Ǵabdýllın» kitabynyń tanystyrylymy ótti.
Is-sharada Ulttyq arhıv dırektory Saǵıla Nurlanova belgili ǵalymnyń ómiri men shyǵarmashylyǵyna toqtalyp, kesh mańyzyn atap ótti. Odan keıin qor ıesine saltanatty túrde sertıfıkat tabys etti.
Serik aǵamyz ulttyq arhıvke 100 saqtaý birligimen 1065 qujat tapsyrdy. Bul qujattarda ótken ǵasyrdyń 30-jyldarynan bastap, búginge deıingi Keńes Odaǵynyń Batyry, kórnekti ǵalym, jazýshy Málik Ǵabdýllın, Álkeı Marǵulan sekildi ult zııalylaryna qatysty alýan túrli, san sıpatty shejirelik materıaldar usynyldy. Sondaı-aq avtordyń jarty ǵasyrdan beri zamanǵa, qoǵamǵa, tarıhqa qatysty jıǵan-tergen dúnıeleri de qamtylǵan.
Mazmundy is-shara barysynda Memlekettik Eltańba avtory Jandarbek Málibekuly, general-leıtenant, professor Abaı Tasbolatov, belgili qalamger Baıanǵalı Álimjanov, fılologııa ǵylymdarynyń doktory Rahymjan Turysbek, rýhanııat janashyrlary Dýlat Orazalın men Qazybek Aıtjanov sóz alyp, ǵalymnyń azamattyq kelbeti men shyǵarmashylyǵy týraly jyly lebizderin bildirdi. Sondaı-aq Abaı atyndaǵy Memlekettik syılyqtyń laýreaty, opera ánshisi Kenjeǵalı Myrjyqbaı áýeletip án salyp, jınalǵandarǵa rýhanı lázzat syılady.