Jetisýda Ekinshi dúnıejúzilik soǵysqa qatysqan kózi tiri 8 ardager ǵana qaldy. Olardy áleýmettik qoldaý is-sharalary turaqty jalǵasyn taýyp otyr. Osyǵan oraı bıyl jergilikti bıýdjetten birjolǵy materıaldyq kómek tóleýge 12 mln teńge bólingen. Odan bólek, jyl basynan beri batyrlarymyzǵa kommýnaldyq qyzmetter úshin 250 myń teńge tólengen eken.
9 mamyrǵa deıin ardagerlerimizdiń árqaısysyna 1,5 mln teńgeden birjoldyq syıaqy úlestiredi. Áskerı qyzmettiń ózge de mindetterin basqa kezeńderde atqarý kezinde jaralanýy, kontýzııa alýy, mertigýi saldarynan nemese maıdanda bolýyna baılanysty múgedek bolǵan áskerı qyzmetshilerge – 100 myń teńgeden, jalpy kólemi 9 mln teńge tólenedi.
«Ekinshi dúnıejúzilik soǵys kezeńinde fashıster men olardyń odaqtastary qurǵan konslagerlerdegi, gettolardaǵy jáne basqa da májbúrlep ustaý oryndaryndaǵy kámeletke tolmaǵan tutqyndarǵa 100 myń teńgeden, soǵysynda qaza tapqan, habar-osharsyz ketken jaýyngerlerdiń ata-analary jáne ekinshi ret nekege turmaǵan jesirlerine 60 myń teńgeden bir rettik kómek beriledi», deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń mindetin atqarýshy Ermek Mızambaev.
Onyń aıtýynsha, soǵysqa qatysýshylary men múgedekteri qajettilikterine qaraı estý apparattary, protezdik-ortopedııalyq buıymdar sııaqty ártúrli tehnıkalyq kómekshi, gıgıenalyq quraldarmen, sondaı-aq sanatorı-kýrorttyq joldamalarmen birinshi kezekte qamtamasyz etiledi.
Ekinshi dúnıejúzilik soǵys jyldarynda tyldaǵy qajyrly eńbegi men minsiz qyzmeti úshin burynǵy keńes odaǵynyń ordenderimen jáne medaldarymen nagradtalǵan adamdarǵa, sondaı-aq 1941 jylǵy 22 maýsymnan 1945 jylǵy 9 mamyrǵa deıingi aralyqta soǵys jyldarynda keminde alty aı jumys istegen jáne tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen nagradtalǵan adamdarǵa, sondaı-aq osy kezeńde medaldarmen marapattalmaǵan adamdarǵa da 60 myń teńgeden tólenedi. Osy sanattaǵy 2159 adamǵa jalpy somasy 129,5 mln teńgeden astam qarajat qarastyrylǵan.
Sonymen qatar 2023 jyldyń sońyna deıin 6 jekelegen sanat boıynsha ardagerlerge 150 myń teńge mólsherindegi áleýmettik tólem tólenedi. Olardyń qatarynda Aýǵanstandaǵy urys qımyldaryna qatysýshylar, Semeı ıadrolyq polıgonyndaǵy synaqtardan zardap shekkender men Chernobyl AES apattyń saldaryn joıýǵa qatysýshylar da bar.
Jetisý oblysy