Prezıdent Qasym-Jomart Toqaevtyń Reseı Federasııasyna sapary Uly Otan soǵysy kezinde iri shaıqastar bolǵan Rjev okrýgindegi tarıhı jerlerge barýdan bastaldy, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy 100-shi jáne 101-shi derbes atqyshtar brıgadasynyń quramynda soǵysqan qazaqstandyq jaýyngerlerge arnalǵan memorıaldyq keshenge gúl shoǵyn qoıyp, bozdaqtardyń rýhyna taǵzym etti.
Memorıal uzyndyǵy 27 metr, bıiktigi 4 metr bolatyn granıt qabyrǵadan turady. Onda «100-shi jáne 101-shi derbes atqyshtar brıgadasynyń jaýyngerleri máńgi jadymyzda saqtalady. Sizderge alǵysy sheksiz qazaqstandyqtar atynan» dep jazylǵan.
Eskertkish taqtanyń oń jaǵyna Qazaqstan kartasy bar panno ornatylǵan. Onda 1941 jyly eki brıgada jasaqtalǵan Almaty jáne Aqtóbe qalalary, sondaı-aq elordamyz – Astana qalasy belgilengen. Osy brıgadalar sapyna Qazaqstannan shaqyrylǵan 9312 jaýyngerdiń esimi mármár taqtalarǵa qashalyp jazylǵan.
Sonymen qatar Memleket basshysy qyrǵyz jaýyngerlerine arnalǵan memorıalǵa gúl shoǵyn qoıyp, qaza tapqan soldattardy bir mınýt únsizdikpen eske aldy.