Jaqynda fılologııa ǵylymdarynyń doktory, Ulttyq ǵylym akademııasynyń akademıgi, jazýshy, 1996-1998 jyldary respýblıkalyq «Egemen Qazaqstan» gazetiniń bas redaktory bolǵan Ýálıhan Qalıjanuly 75 jasqa toldy. Osyǵan oraı «Qazaq gazetteri» JShS bas dırektory Dıhan Qamzabekuly belgili qoǵam qaıratkerine syı-qurmet kórsetti.
Is-sharada Dıhan Qamzabekuly qarymdy qalamgerdiń ónegeli ómir jolyna toqtalyp, onyń qaıratkerlik joly ult baspasózimen bite qaınasqanyn erekshe atap ótti.
«Ýálıhan aǵamyz sekseninshi jyldary «Qazaqstan pıoneri» (qazirgi «Ulan») gazetinde bas redaktor bolǵan kezinde jetkinshekterge arnalǵan basylym túrlenip, jas oqyrmandaryn qýantty. Odan keıin «Jas alash» gazetin basqaryp, ult baspasóziniń damýyna úlesin qosty. Jas jýrnalısterge qamqor bolyp, qoldaý kórsetti. Sondaı-aq «Egemen Qazaqstanǵa» bas redaktor bolǵan jyldary elimizdiń ekonomıkalyq-áleýmettik jaǵdaıy qıyn edi. Osy kezde basylym qyzmetkerlerine jaǵdaı týǵyzyp, ujymdy elordaǵa kóshirýdi uıymdastyrdy», dedi bas dırektor.
Jalpy, ardaqty azamattyń jýrnalıstıkada ǵana emes, ǵylymda da óz qoltańbasy bar. 1978 jyly «Aqmolla aqynnyń ómiri men shyǵarmashylyǵy» atty kandıdattyq, 1999 jyly «Qazaq ádebıetindegi dinı-aǵartýshylyq aǵym (HIH ǵasyrdyń ekinshi jartysy men HH ǵasyrdyń basy)» atty doktorlyq dıssertasııa qorǵady. M.Áýezov atyndaǵy Ádebıet jáne óner ınstıtýtynyń dırektory bolǵan jyldary eleýli ǵylymı jobalardy júzege asyrdy. Parlament Májilisiniń II, III, IV shaqyrylymdarynyń depýtaty boldy. Aýdarmashylyq shyǵarmashylyǵy da belgili.
Jıyn sońynda sóz alǵan Ýálıhan Qalıjanuly qurmet kórsetken bas basylym ujymyna rızashylyǵyn jetkizdi.