Prezıdent Qasym-Jomart Toqaev qazaqstandyqtardy Jeńis kúnimen quttyqtady, dep habarlaıdy Egemen.kz Aqordanyń baspasóz qyzmetine silteme jasap.
Qymbatty otandastar!
Sizderdi Jeńis kúnimen shyn júrekten quttyqtaımyn!
Bul – elimizdiń tarıhynda aıryqsha orny bar mereke. Sondaı-aq beıbitshilik pen bostandyq úshin kúresken aǵa býynnyń janqııarlyǵyn, qajymas qaıraty men erik-jigerin áıgileıtin meıram.
Surapyl soǵys jyldarynda otandastarymyz qaısarlyq pen qaharmandyqtyń teńdessiz úlgisin tanytty. Maıdanǵa attanǵan jaýyngerlerimizdiń teń jartysy urpaqtyń bolashaǵy úshin janyn pıda etti.
Jeńiske tyl eńbekkerleri de ólsheýsiz úles qosty. Olar el basyna kún týǵanda halqymyzdyń judyryqtaı jumyla biletinin eren eńbegimen dáleldedi.
Soǵysta opat bolǵan bozdaqtarymyzdyń rýhyna taǵzym etip, ardagerlerimizge laıyqty qurmet kórsetý – bizdiń perzenttik boryshymyz.
Biz búgingi beıbit ómirimiz úshin jeńimpaz aǵa býynǵa qaryzdarmyz. Olardyń óshpes erligi – keıingi urpaqqa úlgi-ónege. Maıdangerlerimiz jan aıamaı qorǵaǵan azattyq, ádildik, teńdik qundylyqtary Ádiletti Qazaqstan úshin de myzǵymas temirqazyq bolyp qala beredi.
Barshańyzǵa zor densaýlyq, baq-bereke tileımin!
Ardagerlerimiz aman bolsyn!
Jeńis kúni qutty bolsyn!