Qazaqstandyq jankúıerler Astana áýejaıynda álem chempıondary atanǵan Aslanbek Shymbergenov, Nurbek Oralbaı men Mahmud Sabyrhandy jáne kúmis júlde ıelengen Dýlat Bekbaýovty, sondaı-aq ulttyq quramanyń bas bapkeri Myrzaǵalı Aıtjanovty sán saltanatpen kútip aldy, dep habarlaıdy Egemen.kz.
Sportshylarymyzdy Mádenıet jáne sport mınıstrli Ashat Oralov ta áýejaıdan qarsy aldy.
Esterińizge sala keteıik, Sanjar Táshkenbaı (48 kg), Mahmýd Sabyrhan (54 kg), Aslanbek Shymbergenov (71 kg) jáne Nurbek Oralbaı (80 kg) álem chempıondary atansa, Dýlat Bekbaýov (67 kg) kúmis medal enshiledi.
Atalǵan marapattar úshin qazaqstandyq boksshylar halyqaralyq boks qaýymdastyǵynan (IBA) qomaqty qarajat alady. Mysaly, altyn - 200 000 dollarǵa, kúmis - 100 000 dollarǵa baǵalanady.
Sonymen qatar, Qazaqstan boks federasııasy da chempıondardy qur alaqan qaldyrmaı, qosymsha 100 000 dollardan tóleıdi.
Aıta keteıik, Qazaqstan quramasy Tashkentte 4 altyn, 1 kúmis medaldi qorjynǵa salyp, jalpy esepte 2-oryn aldy.
Jalpy, Qazaqstan 1993 jyldan beri egemen el retinde osymen 16 ret álem chempıonatyna bylǵary qolǵap sheberlerin jiberdi. Qazir enshimizde 18 altyn, 16 kúmis, 22 qola júlde bar. Osynyń arqasynda jalpy ÁCh tarıhyndaǵy medal esebinde Qazaqstan AQSh-ty basyp ozyp, 3-orynǵa kóterildi. Birinshi orynǵa - Kýba, ekinshi orynǵa Reseı memleketteri jaıǵasqan. Ulttyq qurama osyǵan deıin tek 2013 jyly Almatyda ótken dúnıejúzi básekesinde 4 altynǵa ıe bolǵan.