Búgin, 15 mamyrda Tashkentte Halyqaralyq boks qaýymdastyǵynyń dırektorlar keńesi jıyn ótkizdi. Otyrys barysynda kelesi jyly ótetin áıelder arasyndaǵy álem chempıonaty Astana qalasynda ótetini habarlandy, dep jazady Egemen.kz.
Halyqaralyq boks qaýymdastyǵynyń baspasóz qyzmeti málim etkendeı, Qazaqstan boks federasııasynyń jaýapty tulǵalary 2024 jylǵy áıelder arasyndaǵy álem chempıonatyn Astanada ótkizýge nıet bildirgen.
Osylaısha, álemniń úzdik boksshy qyzdary «Barys Arenanyń» sharshy alańynda qolǵap túıistiredi.
«Qazaqstan sııaqty qýatty boks eli IBA iri týrnırleriniń birin ótkizedi. Osydan jeti jyl buryn Astanada álem chempıonaty ótken edi. Biz áıelderdiń júlde qoryn kóbeıtemiz. Chempıondar 200 000 AQSh dollaryn alady, al jalpy júlde qory 12 nomınasııa boıynsha 4,8 mıllıon dollardy quraıdy. Bul somanyń 10 paıyzy ulttyq jattyqtyrýshylarǵa beriledi. Aldaǵy chempıonatty asyǵa kútemin jáne 2024 jyly boksshylardy Astana tórinde qarsy alamyn», dedi IBA basshysy Omar Kremlev.
Eske sala ketsek, 2016 jyldyń jazynda Qazaqstan óz tarıhynda alǵash ret áıelder arasyndaǵy álem chempıonatyn ótkizip, onda birinshi komandalyq oryndy jeńip alǵan edi. Odan keıin boksshylarymyz tórt altyn, eki qola medal jeńip alsa, Qytaı ekinshi, AQSh úshinshi orynǵa taban tiredi.