Bokstan Tashkentte ótken álem chempıonatynda atoı salyp, Kók týdy bıikte jelbiretken qazaqtyń batyr uldaryn jankúıer qaýym elorda áýejaıynan syı-qurmet kórsetip kútip aldy. Jahandyq jarysta jasyndaı jarqyldaǵan jerlesterimizdiń jeńisine ortaqtasqan dúıim jurtshylyq sportshylarǵa izgi tilekterin joldady.
Álem chempıondaryn qarsy alýǵa arnaıy kelgen Mádenıet jáne sport mınıstri Ashat Oralov jerlesterimizdiń Tashkent tórinde atoı salǵan kúnin beıresmı túrde «Boks kúni» dep te ataýǵa bolatynyn aıtty. «Bilektiń de, aqyl-oıdyń da kúshimen tórtkúl dúnıeni moıyndatqan jigitterimizdi osy kúnniń naǵyz batyrlary dep aıtýǵa bolady. Kesheden beri bizdiń batyrlarymyz kásibı boksta da jeńiske jetip jatyr. Beıresmı túrde aıtsaq, ótken demalys kúnderi elimizde «Boks kúni» boldy. Osy jyldyń kúzinde Qytaıda Azııa oıyndary ótedi. Al kelesi jyly Parıjde Olımpııa oıyndary uıymdastyrylatyny barshańyzǵa belgili. Endi jigitterimiz sol saıystarǵa jaqsy daıyndyqpen barady degen senimdemiz», dedi Ashat Oralov.
Sonymen qatar vedomstvo basshysy mınıstrlik tarapynan álem chempıondarynyń árqaısyna jáne olardyń jeke bapkerlerine 15 myń AQSh dollarynan beriletinin málimdedi. Sondaı-aq Qazaqstan boks federasııasy tarapynan – 100 myń dollar, AIBA tarapynan 200 myń dollar beriledi.
Al ulttyq quramanyń bas bapkeri Myrzaǵalı Aıtjanov álem chempıonatynan buryn, sol dodaǵa baratyn boksshylardy tańdaý óte tartysty ótkenin jetkizdi. «Jyl basynan beri ár salmaqta myqty degen jigitterdi túrli jarystarǵa jiberip, synap kórdik. Solardyń ishinen eń úzdik nátıje kórsetkenderin tańdap aldyq. Keıin olardy oqý-jattyǵý jıyndarynda da tekserdik. Tashkentke barǵan boksshylar solaı iriktelip alyndy. Al keıbir salmaqtarda irikteý óte qıyn boldy. О́ıtkeni bir salmaqta birneshe myqty boksshy bar. Tipti, keıbiri birdeı nátıje kórsetip jatty. Degenmen, tańdaý jas sportshylarǵa berildi», dedi Myrzaǵalı Aıtjanov.
Qurama kapıtany jáne 71 kılo salmaqtaǵy sý jańa álem chempıony Aslanbek Shymbergenov jahandyq doda joǵary deńgeıde ótkenin atap ótti. «Álem chempıonatynda bar kúshimizdi salyp, jankúıerlerimizdi qýantýǵa tyrystyq. О́zim de qatty qýanyp turmyn. Bul álem chempıonaty qatysýshylar sany eń kóp tirkelgen saıys bolyp sanalady. Ár kezdesýdiń ózindik qıynshylyǵy bar. Men úshin fınaldyq jekpe-jek qıynyraq boldy. Jalpy, Tashkenttegi álem chempıonaty joǵary deńgeıde ótti», dedi Aslanbek Shymbergenov.
1-14 mamyr aralyǵynda ótken bokstan álem chempıonatynda Qazaqstan quramasy 4 altyn, 1 kúmis júldemen jalpykomandalyq esepte О́zbekstan (5 altyn, 2 kúmis, 2 qola) boksshylaryn alǵa jiberip, ekinshi orynǵa ıe boldy. Tashkenttegi dodada Sanjar Táshkenbaı (48 kg), Mahmud Sabyrhan (54 kg), Aslanbek Shymbergenov (71 kg) jáne Nurbek Oralbaı (80 kg) álem chempıony atansa, Dýlat Bekbaýov (67 kg) kúmis júldege ıe boldy.