Memleket basshysy Jetisýǵa kelgen saparynda ınnovasııa jáne bıznes ekojúıesin damytý kerektigin aıtyp, qajetti «IT-Hub» ashýdy tapsyrǵan edi. Jarty jyldan keıin ıgilikti istiń tusaýy kesildi. Jastar resýrstyq ortalyǵy janynan «Jetisu IT-Hub» ashyldy. Tehnoparktiń lentasyn qııýǵa Aqparat jáne qoǵamdyq damý mınıstri Darhan Qydyráli arnaıy keldi.
«Jetisu IT-Hub» – mınıstrlik pen «Astana Hab» jáne Jetisý oblysy ákimdigimen birlese atqarylǵan joba. Hab jumysy netvorkıngti damytýǵa, tájirıbe almasýǵa, HR-ıventterdi, oqytý baǵdarlamalary men sheberlik synyptaryn ótkizýge, speed-rekrýtıngke baǵyttalǵan. Odan bólek, ortalyqqa personaldy basqarý tıimdiligin arttyrý jáne 2025 jylǵa IT qyzmetteriniń eksportyna qol jetkizý mindeti de júktelgen.
Ashylý saltanatynda mınıstr Darhan Qydyráli mundaı ortalyqtardyń jastar úshin asa mańyzdy ekenin atap ótti. «Bul bizdiń alǵashqy jobamyz jáne ol Jetisý jerinen bastaý alyp jatyr. Prezıdent jastarǵa úlken mán berip, qamqorlyq jasap keledi. Taıaýda Memleket basshysy Jastar saıasaty týraly zańǵa qol qoıdy. Zań boıynsha jastar sanaty 35-ke deıin ulǵaıtylǵanyn bilesizder. Jastar saıasaty týraly tujyrymdama qabyldandy. Jalpy, jastarǵa arnalǵan «Jas project» jáne «Táýelsizdik urpaqtary» sekildi jobalar jas býynnyń damýyna erekshe serpin beredi», dedi mınıstr.
Jańa tehnoparkte jastar saıasaty týraly tujyrymdamaǵa saı sıfrlyq saýattylyq boıynsha óńirlerdegi 1,5 mln jasty oqytý josparlanyp otyr. Jastar ortalyǵy janyndaǵy «Jetisu IT-Hub» ta osy mejeni oryndaýy qajet. Habta jastar óz startaptaryn jasap, kásipkerlik jobalaryn bastaıdy.
«Maqsat – stýdenterge IT startap jobalardy jasaýǵa kómektesý. Olar bizge ıdeıa túrinde keledi biz olarǵa eńbekpen modelge qalaı jetkizýge bolatynyn túsindiremiz. Ári naryqqa shyǵýǵa jol ashamyz. Mashyqtaryn arttyryp, jobalaryn iske asyrýǵa septesemiz», dedi qalalyq «IT-Hub» menedjeri Ásel Qulyntaeva.
Budan bólek, «Sumsung» kompanııasynyń qoldaýymen «Sumsung Innovation Campus» kabıneti ashylǵan. Kampýsta 15 jas azamat bilim alyp jatyr. Jastar tendensııasyna sáıkes «no code» baǵdarlamasy arqyly joba jasalýda. Osy rette mınıstr jastarǵa sáttilik tilep, ortalyq pen «IT-hub» jańa talanttarǵa jola ashady degen senim bildirdi.
Habtyń biregeıligi – baǵdarlamalaý, derekterdi taldaý, mashınalyq oqytý algorıtmderi, kıber qaýipsizdik, qosymshalardy ázirleý oqytýshysyz jáne dáristersiz júrgiziledi. Jasóspirimder tájirıbelik máselelerdi sheshýmen qatar, IT negizderin ózdiginen úırenip, bul salaǵa endi kelgenderge kómektesedi. Mamandar bul IT men kreatıv ındýstrııaǵa basymdyq bere otyryp, qala ekonomıkasynda «qurylymdyq manevrdi» damytýǵa jol ashatyn ınfraqurylymdyq joba ekenin aıtady.
Sapar barysynda mınıstr «Jetisý» telearnasy ujymymen kezdesip, arnanyń tynys-tirshiligimen tanysty. Arnaıy stýdııalardy aralap, telejýrnalısterge kásibı sheberligi úshin alǵys bildirdi. Teleradıo kompanııasynyń shyǵarmashylyǵyna tabys tilep, osy mejeden túspeıtinine senim bildirdi.
«Jetisý» – óńirde bolǵanyna qaramastan, búkil respýblıkamyzǵa, jalpy shetelge taraıtyn mańdaıaldy, betke ustar arnalardyń biri. Halyqtyń júreginde qalǵan Beısen Quranbektiń sózi men kózi. Búginde telekompanııa Beısen baýyrymyz bastaǵan úlken joldy abyroımen jalǵastyryp keledi», dedi D.Qydyráli.
Budan keıin vedomstvo basshysy B.Rımova atyndaǵy Taldyqorǵan qalalyq teatrynda Jetisý jurtshylyǵymen dıdarlasyp, halyqtyń kókeıinde júrgen suraqtaryna jaýap berdi. Kezdesýden soń mınıstr jeke suraqtary bar azamattardy qabyldap, máselelerine qulaq túrdi.
Jetisý oblysy