Oral qalasynda tanymal satırık, Qazaqstan Respýblıkasynyń mádenıet qaıratkeri, ómirden erte ketken Rashıd Shaqýdy eske alý keshi ótip, qalamger turǵan úıge eskertkish taqta ornatyldy.
Is-sharany Qazaqstan Jazýshylar odaǵynyń Batys Qazaqstan oblystyq fılıaly jáne Qadyr Myrza Áli atyndaǵy óner jáne mádenıet ortalyǵy uıymdastyrdy. Eskertkish taqtanyń shyǵynyn marqumnyń dosy, óner janashyry Sháhıdolla Ábýǵalı kóterip alǵan.
Ál-Farabı atyndaǵy ulttyq ýnıversıtettiń jýrnalıstıka fakýltetin bitirgen Rashıd búkil sanaly ómirin Batys Qazaqstan oblystyq teleradıo korporasııasynda ótkizdi. Ol qalamgerliginen bólek, Aqjaıyq óńiriniń mádenıeti men óneri, aıtýly tulǵalary jaıynda habarlar sıklin jasaǵan rýhanııat janashyry edi. Rashıdtiń satıralyq shyǵarmalarynyń ózi «Támam jannyń minin aıt, Jalǵan aıtpaı, shynyn aıt, Aıap, ishiń jylyp aıt – Adamdy bastyr ilgeri» deıtuǵyn Shákerim oıshyldyń qaǵıdasyna saı edi.
Qadyr Myrza Áli atyndaǵy óner jáne mádenıet ortalyǵynyń «Jarq etip sóngen bir juldyz» jobasy aıasynda ótken «Satıranyń soıy» atty eske alý is-sharasynda qalamger týraly áriptesteri Baýyrjan Halıolla, Saǵyntaı Bısenǵalıev, Baýyrjan Ǵubaıdýllın, Klara Hambetovalar áserli estelik aıtty. Qazaqtyń taǵy bir aıaýly tulǵasy – bard aqyn Tabyldy Dosymov pen Rashıdtiń qylaýsyz dostyǵy da áńgime arqaýy boldy. Rashıd Shaqýdyń «Arys» baspasynan jaryq kórgen «Sóz jebesi» atty kitabyn aqynnyń qaryndasy Álııa Shaqýova keńirek tanystyryp ótti.
«Biz ómirine qalamdy serik etip, qazaqtyń óneri men mádenıetine eńbek sińirgen áriptesterimizdi árdaıym umytpaımyz. Bolashaqta «Qurmet» ordeniniń, Qazaqstan Parlamentiniń «Parlament sózi» syılyǵynyń laýreaty, respýblıkalyq «Egemen Qazaqstan» gazetinde uzaq jyl qyzmet atqarǵan tanymal jýrnalıst Temir Qusaıyn aǵamyzdyń da turǵan úıine osyndaı eskertkish taqta ashylatyn bolady», dep habarlady Qazaqstan Jazýshylar odaǵy Batys Qazaqstan oblystyq fılıalynyń dırektory Baýyrjan Halıolla.
Batys Qazaqstan oblysy