Sán áleminde oıyp alar orny bar «Asyl dızaın» sán úıiniń otyz jyldyǵyna oraı Tarazda dástúrli «Aspara Fashion Week» aptalyǵynyń on birinshi maýsymy uıymdastyryldy. Halyqaralyq is-sharaǵa joba jetekshisi Aıdarhan Qalıev, «Irına Naboko» sán úıiniń bas dızaıneri Irına Naboko, basqa da mártebeli meımandar qatysty.
Sán aptalyǵyna Astana, Atyraý, Aqtaý, Aqtóbe, Oral qalalarynan, Qytaı, Tatarstan, Qyrǵyzstan, О́zbekstan sekildi kórshiles elderden kelgen dızaınerler jınalǵandardyń nazaryna óz toptamalaryn usyndy. Olardyń ishinde balalarǵa arnalǵan kıim toptamalary da boldy.
Is-sharanyń sońǵy kúni «Asyl-Dızaın» sán úıiniń «Neo-folklor» etnostyq stılindegi zamanaýı «aspara» ulttyq brend toptamalaryna arnaldy. Otyz jyl boıyna zamanaýı úrdistermen úılesetin qazaqtyń ulttyq kıimin nasıhattap kelgen «Asyl-Dızaın» sán úıiniń avtorlyq toptamalary jurtshylyq tarapynan úlken qyzyǵýshylyq týdyrdy. Buǵan deıin «Aspara» brendiniń maýsymdyq toptamalary Eýropa men Azııadaǵy iri podıýmdarda kórsetilip, sánqoılardy tánti etken edi.
«Naqtyraq aıtar bolsaq, Aspara Fashion Week» jobasynyń ózine tán baǵyty bar. Neo-folklorlyq stıldegi kıimderdi dızaıner retinde 10-15 jyl buryn jasadym. Búginde bul stıldi Qazaqstan ǵana emes, búkil álem elderi biledi.
«Neo-folklor» – ulttyq kıim men sán úlgisiniń zamanaýı úlgimen ushtasqan, sátti tolyqtyrylǵan jańa baǵyt. Halyqaralyq jobamyzdyń 10 maýsymyna 600-den astam dızaıner qatysqan. Osy ýaqyt aralyǵynda ulttyq kıimimizdi nasıhattap qana qoımaı, Jambyl oblysyn da álemge tanytýdy maqsat ettik. Bul jumys on birinshi maýsymda da sátimen jalǵasty», deıdi joba jetekshisi A.Qalıev.
Sán aptalyǵynyń sońǵy kúninde birneshe baǵyt boıynsha baıqaý uıymdastyrylyp, jeńimpazdar anyqtaldy.
Jambyl oblysy