Kásipkerlerdiń «Atameken» ulttyq palatasy – elimizde túrli bıznestiń damýyna yqpal etý úshin Úkimet jáne jergilikti memlekettik organdarmen kómek pen kelissózderdi kúsheıtý yńǵaıynda qurylǵan qosalqy uıym. Ol ásirese shaǵyn jáne orta bıznestiń múddesin qorǵaıdy. Iri bıznestiń de onyń kómegine zárý bolatyn kezi az emes. Elimizdiń barlyq oblysynda uıymnyń fılıaldary ashylǵan. Sonyń ishinde Soltústik Qazaqstan oblystyq fılıaly da bar. Jýyrda osy uıymnyń ókilderi jýrnalısterdiń aldyna shyǵyp, ózderiniń atqaryp jatqan jumystary týraly baıandady.
Soltústikqazaqstandyq fılıaldyń kásipkerlikti qarajatsyz qoldaý bóliminiń basshysy Ásel Samaratova ózderiniń isi kásipkerlikti 2021-2025 jyldar aralyǵynda damytý jónindegi Ulttyq jobanyń sheńberinde júrgizilip jatqanyn aıtty. «Bizdiń eń aldymen qolǵa alǵan baǵytymyz «Kásipke baǵyttaý» dep atalady. Bul baǵyt halyqtyń arasynan kásipkerlik áleýetti arttyrý úshin iskerlikke oqytýdy qamtıdy. Ekinshi baǵytymyz áıelder arasynda kásipkerlikti damytýdy maqsat etken ortalyqtar qurý. Munda belsendiligi joǵary áıelderdiń startaptaryn yntalandyrý, ekonomıkalyq bilimin ushtaý máseleleri qarastyrylady. Úshinshi baǵytymyz – «Bir aýyl – bir ónim» dep ataldy. Munyń mánisi – jergilikti ónimderdiń sapasyn arttyryp, ony brend etýge kúsh salý», dedi ol óziniń sózinde.
Bıznespen aınalysý týraly másele qozǵalsa boldy – onyń bolashaǵyn, damýyn tek qarjy quıýmen ushtastyratyndar kóp. Biraq qarjy quımaı-aq aldymen osyndaı baǵyttarǵa siltep, belsendi jandardyń yntalanýyna jol ashýǵa bolady eken. «Kásipkerlerge qoldaý kórsetý ortalyqtary» aıasynda jumys isteıtin kásipkerlerge jáne kásipkerlik bastamasy bar tulǵalarǵa aqparattyq-analıtıkalyq qyzmetter jáne servıstik qoldaý qyzmetteri jatady. Barlyq qyzmet tegin kórsetiledi. Jyl basynan beri oblysta 207 kásipkerge 212 qyzmet kórsetilipti. Al aqparattyq-analıtıkalyq qyzmet boıynsha 611 adamǵa 3 191 qyzmet kórsetilgen eken.
«Kásipke baǵyttaý» baǵdary boıynsha qandaı jumystar atqarylyp jatqanyn ortalyqtyń menedjeri Janar Orazalınova baıandap, iskerlikke bet burǵan jandar kásibı-sarapshylardan tegin keńester alyp, ózderiniń biliktilik áleýetin arttyratynyn aıtty. «Bul baǵyt boıynsha iskerliktiń barlyq túri qamtylady. Sonyń ishinde óndiris te bar. Sarapshylar ózderiniń keńesterin onlaın jáne oflaın rejiminde kórsete alady. Osyndaı keńes alǵan kásipkerlerge sertıfıkattar da beriledi», dedi ol.
Áıelder kásipkerligin damytý ortalyǵynyń maqsaty – kásipker áıelderge, sondaı-aq kásipkerlik bastamasy bar áıelderge qarjylaı emes qoldaý kórsetý, munda olar belsendilikti arttyrý jáne oqytý baǵdarlamalaryna qatysý úshin birqatar qyzmetti ala alady. Naqty aıtqanda, munda olar 7 túrli qyzmet ala alady. Sonyń ishinde dástúrli qolóner, bızneske aqsha tartý joldary, bıznes-sholýǵa tapsyrys berý sekildi qyzmetter bar. Áıelderdiń kóbi bir kásipti úırený máselesimen ortalyqqa qaıyrylady eken. «Osy qyzmetti alýǵa búgingi tańda 114 tapsyrys tústi. Bıznespen aınalysqandaryna kem degende eki jyl bolǵan áıelderge de tálimgerlik kómek kerek eken. Ondaılardy tabý úshin biz konkýrs jarııalaǵan edik, 20 ótinish tústi. Sonyń segizin tálimger retinde qabyldadyq», dedi ortalyqtyń taǵy bir menedjeri Irına Vasıleva.
Jyldyń basynan beri kásipkerler ortalyǵyna bıznes bastaǵysy kelgen 124 qyz-kelinshek ótinish tastapty. Mundaǵy menedjerler olardyń báriniń ótinishin qanaǵattandyrdyq, deıdi.
«Bir aýyl – bir ónim» jobasyna burynnan kásipkerlikpen aınalysqandar da, jańadan bastaǵysy kelgender de qatysa alady. Bul bastamanyń ózi alǵash ret Japonııada kóterilgen eken. Oǵan qatysatyndar – aýyl áıelderi. Olar jergilikti shıkizattardan ónim shyǵaryp, bir-birimen aqyldasyp, aqyry kooperasııa qurady. Sóıtip, ózderiniń brendterine qol jetkizgen eken. «Bizdegi jobaǵa qatysýǵa ázirge 12 adam ótinish bildirdi. Olar da ózderiniń brendin birlese damytýǵa kúsh salmaq», dedi Irına Vasıleva.
Soltústik Qazaqstan oblysy