Premer-mınıstr Álıhan Smaıylov pen Eýropalyq komıssııanyń atqarýshy vıse-prezıdenti Valdıs Dombrovskıs Almatyda ótip jatqan «EO-OA» ekinshi ekonomıkalyq forýmy aıasynda Qazaqstan men Eýropalyq Odaq arasyndaǵy yntymaqtastyqty odan ári nyǵaıtý perspektıvalaryn talqylady, dep habarlaıdy Egemen.kz Úkimettiń baspasóz qyzmetine silteme jasap.
Álıhan Smaıylovtyń aıtýynsha, Eýroodaq – Qazaqstannyń saýda-sattyq salasyndaǵy eń iri jáne mańyzdy seriktesteriniń biri, elimizdiń syrtqy saýdasynyń shamamen 30%-y Eýroodaqtyń úlesine tıesili. Máselen, ótken jyly taýar aınalymynyń ósimi 38%-dan asyp, shamamen $40 mlrd boldy. Bıyl da bul kórsetkish qarqyndy ósip keledi: 3 aıda saýda kólemi 12,5%-ǵa ulǵaıyp, $10 mlrd-tan asty. Osy oraıda Qazaqstan Eýropaǵa jalpy quny shamamen $2,3 mlrd bolatyn 175 taýar pozısııasy boıynsha eksportty ulǵaıtýǵa daıyn.
«Biz Eýropalyq Odaqpen yntymaqtastyqtyń sapasyn arttyrýǵa basymdyq beremiz jáne Qazaqstan men Eýropa arasyndaǵy senim men qurmetke negizdelgen ózara is-qımyldy ári qaraı nyǵaıtýǵa nıettimiz», dedi Premer-mınıstr.
Sonymen qatar, Úkimet basshysy Qazaqstan men EO arasyndaǵy ınvestısııalyq yntymaqtastyqtyń jańa deńgeıge kóterilip jatqanyn atap ótti. Atap aıtqanda, ótken jyly Eýroodaqtan Qazaqstan ekonomıkasyna tartylǵan tikeleı ınvestısııalar kólemi shamamen 23%-ǵa ósip, $12,5 mlrd boldy, bul – sońǵy 10 jyldaǵy rekordtyq kórsetkish.
«Biz ınvestısııalyq yntymaqtastyqty odan ári keńeıtý úshin qolda bar múmkindikterdiń barlyǵyn iske qosýǵa múddelimiz», dedi Álıhan Smaıylov.
О́z tarapynan Valdıs Dombrovskıs Eýroodaq pen Qazaqstan arasyndaǵy qarym-qatynastar óte serpindi damyp kele jatqanyn, oǵan keńeıtilgen áriptestik pen yntymaqtastyq týraly kelisim jáne shıkizat, akkýmýlıatorlyq batareıalar jáne jańartylatyn sýtektiń turaqty qun tizbekteri jónindegi memorandým yqpal etetinin atap ótti.
«Sonymen qatar, biz Ortalyq Azııa men Eýropalyq Odaq elderi arasynda júk tasymaldaýdyń jańa joldary men múmkindikterin damytýǵa múddelimiz. Ol úshin ınvestorlardy óńirdegi jobalarǵa tartý qajet, bul tasymaldaý kezinde kedergilerdi joıýǵa jáne ınfraqurylymdy damytýǵa yqpal etedi», dedi Valdıs Dombrovskıs.
Kezdesý qorytyndysy boıynsha Shıkizat, akkýmýlıatorlyq batareıalar jáne jańartylatyn sýtektiń turaqty qun tizbekteri salasyndaǵy strategııalyq áriptestik týraly QR men EO arasyndaǵy ózara túsinistik týraly memorandýmdy iske asyrý boıynsha jol kartasyn bekitý rásimi ótti.
Eske sala keteıik, osy memorandýmǵa ótken jyly BUU-nyń klımattyń ózgerýi jónindegi «COP-27» konferensııasynda QR Premer-mınıstri Álıhan Smaıylov pen Eýropalyq komıssııanyń Prezıdenti Ýrsýla fon der Lıaıen qol qoıǵan bolatyn.
Sonymen qatar, Qazaqstanda 9 mln eýro somasyna jobalardy iske asyrýdy kózdeıtin «QR-EO yntymaqtastyq quraly» qarjylyq kelisimine qol qoıyldy.Kezdesý qorytyndysy boıynsha Álıhan Smaıylov pen Valdıs Dombrovskıs birge BAQ-qa málimdeme jasady.