Italııanyń Emılıa-Romanıa aımaǵyndaǵy kóp eldi mekendi áli de sý basyp jatyr. О́tken aptada bastalǵan jańbyr endi ǵana tolastady. Sý tasqyny qaýpi Italııanyń soltústiginen ońtústikke qaraı jyljyp, Kalabrııada qaýipsizdiktiń «qyzǵylt sary» deńgeıi jarııalandy, onda buqaralyq is-shara toqtatyldy.
Eldiń úkimet basshysy Djordja Melonı G7 sammıtinen kele sala Emılıa-Romanıa óńirine bet aldy. Qazir tabıǵı apat saldarymen kúresýge júzdegen erikti jumyldyrylǵan. Nóser jaýyn aýyl sharýashylyǵyna orasan zor shyǵyn keltirdi. 40-tan astam qala zardap shegip, 14 adam qaza tapty. Qazir ondaǵy 36 myń turǵyn qaýipsiz jerge kóshirildi. Kóp adam iz-túzsiz joǵalǵandar tiziminde. Eriktilerdiń aıtýynsha, qazir sý basqan birqatar eldi meken turǵyndary aýyz sý men azyq-túlikten taryǵyp otyr. Joıqyn tasqyn men daýyldan keıin 20-dan astam ózen arnasynan asqan.
«Sý tasqyny bolǵan aýdandardy aralap júrmin. Meni adamdardyń tabıǵat apatyna moıymaı, saldaryn joıýǵa kúsh salyp jatqany tańǵaldyrdy. Biz japa shekken turǵyndarǵa barynsha qoldaý kórsetemiz», dedi Djordja Melonı.
«The Guardian» basylymynyń habarlaýynsha, Emılııa-Romanıa gýbernatorynyń orynbasary jáne azamattyq qorǵanys bólimshesiniń basshysy Iren Prıolo aımaqtaǵy 100-ge jýyq mýnısıpalıtet sý tasqynynan zardap shekkenin, bul 2012 jyly aımaqta bolǵan joıqyn jer silkinisinen zardap shekkenderden úsh ese kóp ekenin málimdegen. Ravennanyń ózinde nóser birneshe kún boıy tynbaı, qala meri Massımo Izola qalany qorshap turǵan tóbelerde ornalasqan aýyldardaǵy apatty jaǵdaı týraly habarlady. Kóshkinniń júrý qaýpi joǵary, bul aımaqtarǵa qutqarýshylardyń jetýi óte qıyn. Degenmen, jumys jalǵasyp, qutqarýshylar sý tasqynynan zardap shekkenderdi áli evakýasııalap jatyr. Italııanyń soltústiginde 36 saǵat boıy jaýǵan tolassyz jaýynnyń saldarynan jarty jyldyq jaýyn-shashyn túsip, keltirilgen shyǵyn mıllıardtaǵan eýroǵa baǵalanyp otyr.
Sý tasqynynyń saldarynan Imoladaǵy «Formýla-1» jarysy toqtatyldy. О́tken juma kúni «Formýla-1» uıymdastyrýshylary zardap shekken aımaqtardy qalpyna keltirýge kómektesý úshin bir mıllıon eýro beretinderin aıtty. Buǵan deıin «Ferrarı» komandasy da osyndaı ýáde bergen edi.
Sheteldik ǵalymdardyń paıymdaýynsha, aýa raıynyń ystyq tolqyny, qatty daýyl, sý tasqyny jáne qurǵaqshylyq sııaqty ekstremaldy qubylystar adamdardyń parnıktik gazdar shyǵaryndylarynan týyndaǵan klımattyń ózgerýine baılanysty jıi jáne qarqyndy bolyp keledi.
Italııa premer-mınıstri Djordja Melonı Hırosımadaǵy G7 sammıtiniń aıaǵyna deıin qatysa almady, aldyn ala josparlanǵan Qazaqstanǵa saparynan da bas tartty. Ol sý tasqyny saldarynan jarııalanǵan tótenshe jaǵdaı kezinde eline oralyp, halqymen birge bolýdy uıǵardy.
«Emılıa-Romanıa aımaǵynda bolǵan joıqyn sý tasqyny saldarynan kóptegen adamnyń qaza tabýyna baılanysty Italııa premer-mınıstri Djordja Melonı tabıǵat apatynan zardap shekken óńirlerge barý úshin Hırosımada ótken G7 sammıtiniń sońyna deıin qatyspaı, eline qaıtyp bardy. Kelip túsken málimet boıynsha Italııanyń soltústiginde kem degende 40-tan astam eldi meken sý astynda qalyp, 20 myńnan astam adam baspanasynan aıyryldy. Osy sebepke baılanysty Italııa úkimeti basshysynyń Astanaǵa aldyn ala josparlanǵan jumys sapary bolmaıdy», dep málimdedi Qazaqstan Prezıdentiniń baspasóz hatshysy Rýslan Jeldibaı.
Ol Italııa tarapynyń Prezıdent Qasym-Jomart Toqaev pen Djordja Melonıdiń telefon arqyly sóılesýin uıymdastyrýdy suraǵanyn atap ótti.
«Legambiente» ekologııalyq uıymynyń málimetinshe, 7 mıllıonǵa jýyq ıtalııalyq sý tasqyny qaýpi bar aımaqtarda turady. 2014 jyly sol kezdegi premer-mınıstr Matteo Rensı «Italia sacra» – «Qaýipsiz Italııa» jedel tobyn qurdy, onyń mindeti sý tasqyny men kóshkinniń aldyn alý edi. Alaıda 2018 jyly Djýzeppe Konte úkimeti bul topty taratyp, óz jobasyn usyndy.