«Jádiger jerde qalmasyn!» aksııasymen aqtóbelikter oblystyq tarıhı-ólketaný mýzeıiniń qoryna biraz qundy jádiger tapsyrdy. El ishinde áli kúnge deıin ata-babalarynyń «kózin» úılerinde saqtap júrgender kóp. Sońǵy jyldary qorǵa ustanyń kórigi, tary túıetin keli-kelsap, alasha, ádemi órnektelgen sandyq-kebeje sııaqty turmystyq buıymdar kóptep tústi.
Mýzeı qoryna túsken sońǵy jádigerlerdi Bilim berý isiniń qurmetti qyzmetkeri, Qazaq ulttyq jaratylystaný ǵylymdary akademııasynyń korrespondent-múshesi Abaı Orynbaev, belgili qolóner sheberi Erqosaı Ábilov, Aýǵan soǵysy ardagerleriniń tóraǵasy Aslan Balqasynov, jeke kásipker Artem Vasılenko, Aqserik Tóremuratova, Aqalma Izbasova, Syrym Baıdrahmanov tapsyrdy.
Jyl ishinde murajaıǵa 1 216 eksponat túsken. Olardyń qatarynda mýzeı ardageri Rysjan Ilııasovanyń jeke zattary, Ábilqaıyr hannyń jary Bopaı hanym kratınasy, soǵys ardagerleriniń orden-medaldary, karate-dodan Halyqaralyq dárejedegi sport sheberi Rınat Saǵyndyqovtyń sporttyq quraldary bar. Qundy eksponattar qatarynda eki júz jylǵa jýyq tarıhy bar quman men bir ǵasyr buryn qoldanylǵan túbit taraıtyn aıa bar. Muǵaljar aýylynyń turǵyny Serikbaı Esetov Tósbulaq degen jerde jazda shóp shaýyp júrip quman taýyp alǵan. Qumannyń astynda 1833 degen jazý bar eken. Salmaǵy 2 kılodan asatyn jez quman qum ishinde jaqsy saqtalǵan.
Ertedegi sheberlerdiń qoldarynan shyqqan zattarǵa qarap, qazaqtyń ulttyq turmystyq buıymdaryn sol úlgide jańarta bilý óte mańyzdy, deıdi qolóner sheberi Bulbul Kápqyzy. О́ıtkeni qazirgi sheberler kóp jaǵdaıda qazaqty órnekterdi qoldaný retin bile bermeıdi eken. Onyń aıtýynsha, ertede qyz-kelinshekterdiń kamzoldary men beshpentteriniń óńirine gúlderdiń órnegin kóp salǵan. «Sonyń ishinde qyzǵaldaqtyń sýreti basym. Mundaı erekshelik qazaqtyń barlyq óńirine de tán. Ájelerimiz qaı kıimge órnek salýdy jaqsy bilgen. Al qazirgi sheberler kóp jaǵdaıda erler men áıelder kıimderiniń órnekterin shatastyrǵany bylaı tursyn, kıiz-syrmaqqa japsyratyn qoshqar múıizdi barlyq qıimge japsyrýdy sánge aınaldyrdy. Bul durys emes», deıdi qolóner sheberi.
Jádigerlerdi qabyldaý aksııasy jyl boıy jalǵasady. Sondyqtan da turǵyndar úıde eleýsiz jatqan eski buıymdardy mýzeı qoryna ákep tapsyrǵany abzal, deıdi mýzeı mamandary. Mundaı zattarda ertedegi ustalar men zergerlerdiń qoltańbasy qalǵan. Kıege de ıe kerek.
Aqtóbe oblysy