Jastarǵa arnalǵan baǵdarlama

Baǵdarlamany júzege asyrýǵa Asta­na­ qalasy ákimdigi 1,5 mlrd teńge, «Ot­ba­sy bank» 1,5 mlrd teńge bólip otyr. Nátıjesinde, bıyl 35 jasqa deıingi 200 adam baspanaly bolady. «Otbasy bankiniń» ortalyq fılıalynyń basshysy Jansultan Mataevtyń aıtýynsha, ıpotekalyq nesıeniń shekti somasy 18 mln teńge shamasynda qalmaq.

«Bank baǵdarlama qatysýshysynyń tó­lem qabilettiligin tekserip, jyldyq mól­­sherlemesi 5 paıyzben (JTSM 5,2 %-dan­ bastap) jeńildetilgen ıpotekalyq ne­sıe beredi. Alǵashqy jarna – 10%. Elor­da jastaryna beriletin ıpotekalyq ne­sıe­niń eń joǵary somasy – 18 mln teńge, merzimi 25 jylǵa deıin. Onyń kómegimen alǵashqy nemese ekinshi naryqtan, sondaı-aq «Qazaqstan turǵyn úı kompanııasy» AQ-nyń kepildemesimen úlestik qatysý sharty boıynsha salynyp jatqan turǵyn úı satyp alýǵa bolady», dedi bank ókili.

Ilkimdi istiń ıgiligin muǵalimder, dárigerler, JOO jáne ǴZI oqytýshylary men qyzmetkerleri, jýrnalıster, mádenıet salasynyń qyzmetkerleri, sportshylar men jattyqtyrýshy oqytýshylar, áleýmettik qyzmetkerler, kommýnaldyq sala qyzmetkerleri, polısııa departamenti qyzmetkerleri, tótenshe jaǵdaılar departamenti qyzmetkerleri, turǵyn úı kezeginde turǵan jetim balalar kóre alady.

«Áleýetti qaryz alýshylardyń tizimin jergilikti atqarýshy bılik jasaıdy. Jalpy, 2021-2022 jyldar aralyǵynda baǵdarlamaǵa qatysýǵa 1 179 adam ótinish berdi. Onyń ishinde tólem qabilettiligin rastaǵan 184 jas maman baspanaly boldy. Berilgen ıpotekalyq kredıt somasy 3,12 mlrd teńgege jýyq», dep sózin tú­ıindedi J.Mataev.

Baǵdarlamada qatysýshynyń jáne onymen birge turatyn otbasy múshe­le­riniń sońǵy 1 jyl ishinde Astana qalasynda turaqty tirkelýi eskeriledi. Sondaı-aq 10% mólsherindegi alǵashqy jarnasy, sońǵy 5 jylda turǵyn úıi bolmaýy qajet. Tabys kólemi de 6 aıda kúnkóris deńgeıinen aspaýy kerek. Bul shamamen 243 402 teńgeni quraıdy (zeınetaqy jarnasy, jeke tabys salyǵy jáne basqa da mindetti jarnalardy qospaǵanda).