«Qazgıdromet» RMK aldaǵy úsh kúnge arnalǵan aýa raıy boljamyn usyndy, dep habarlaıdy Egemen.kz.
«Qazgıdromet» málimetine sáıkes, eldegi aýa raıyn atmosferalyq frontaldy bólimder aıqyndaıdy. О́tkinshi jańbyr jaýyp, naızaǵaı oınaıdy. Elimizdiń ońtústiginde, ońtústik-shyǵysynda jáne shyǵysynda burshaq jaýýy múmkin. Qatty jańbyr 30 mamyrda Shyǵys Qazaqstanda, 1 maýsymda Batys Qazaqstan jáne Atyraý oblystarynda kútiledi. Tek antısıklon jotasymen Qyzylorda jáne Ulytaý oblystarynda jaýyn-shashynsyz aýa raıy saqtalady. Sondaı-aq respýblıka boıynsha jeldiń kúsheıýi kútiledi. Respýblıkanyń ońtústik-batysynda jáne ońtústiginde shańdy daýyl boljanady.
Qazaqstan boıynsha kúndiz temperatýralyq fon: batysta jáne soltústik-batysta 28-36 gradýs jyly, soltústikte, ońtústik-shyǵysta jáne ortalyqta 25-35 gradýs jyly, ońtústikte 32-37 gradýs jyly, shyǵysta 20-28 gradýs jylyǵa deıin birtindep joǵarylaıdy.