Abzal analar aman bolsyn!

Júregi jylylyqqa toly, jetim men jesirdi esirkeı biletin jannyń peıili keń, sezimtal keletini, árdaıym shamasy kelse qolushyn berýge ázir turatyny barshaǵa aıan. Mundaı adamdar aramyzda az emes. Osydan týra 20 jyl buryn Batys Qazaqstan men Atyraý oblystarynda kenetten sý tasqyny bolyp, zardap shekken óńirlerge gýmanıtarlyq jedel kómek kórsetý maqsatynda «Azamat» atty bizdiń shaǵyn avıamekeme­niń músheleri «Bóbek» halyqara­lyq qaıyrymdylyq qorynyń basshysy Sara Nazarbaevanyń qoldaýymen Almaty – Oral – Atyraý – Almaty baǵyty boıynsha saparǵa attandy. Ushaqqa tıelgen alty tonnadaı arnaýly júgimiz – dári-dármek, kıim-keshek, azyq-túlik edi. Bul sharaǵa sol kezdegi Jastar isi, týrızm jáne sport mınıstri Birǵanym Áıtimovanyń da tikeleı qatysy bolǵanyn aıta ketý kerek. Ol bizge resmı hat joldaǵan edi. Hatta Batys Qazaqstan men Atyraý oblystaryndaǵy sý tasqynynan zardap shekken aımaqtaǵy balalardy Almatydaǵy «Gornoe solnse» pıoner lagerine jetkizý jáne keri ákelip salý jóninde ótinish bildirilgen bolatyn. Sol saparymyzda Oral qala­syna kelip, júgimizdiń jartysyn túsirip, ushaǵymyzǵa janarmaı quıdyq ta, mektep jasyndaǵy 30-35 balany alyp Atyraýǵa bet aldyq. Bunda da «Bóbek» qorynyń jergilikti ýákilderi, jastar qoǵamy biz ákelgen qaıyrymdylyq maqsatyna arnalǵan júkterdi túsirip alyp, 30 shaqty balany ushaqqa mingizip, elimizdiń sol kezgi astanasy Almatyǵa attandyryp saldy. Almatyda balalar jaqsylap demalǵan soń elderine – Oral men Atyraýǵa jetkizdik. Balalardyń aty-jóni tirkelgen qujattardy qolyma alyp qarap otyrsam, bireýleri kópbalaly otbasynan shyqsa, bireýleri múlde jetim ekeni jazylypty. Ushaq Almatydan biraz ushyp shyqqan soń ushqyshtar otyratyn kabınaǵa, qasymyzǵa ruqsat surap 14-15 jastaǵy bala kelip, ózin tanystyrdy. Esimi Berik, Aqpáterden eken, aýyldas bolyp shyqtyq. Qazir Berik Aqsaı qalasynda býhgalter bolyp qyzmet isteıdi, eki balanyń ákesi. Al qalǵan 70 shaqty balanyń taǵdyry bizge belgisiz, osy maqala gazet betine shyǵyp jatsa, bálkim, habarlasar... Sóz arasynda sol joly ıgi maqsatymyzǵa qoldaý kórsetý ornyna, teris qabaǵyn kórsetken kisápirler de kezdespeı qalmaǵany eske túsedi. Máselen, sol joly 2-3 tonna qajetti janarmaıdy Almatydan ala almadyq, ol kezde avıa janarmaıyna (kerosın TS-1) zárýlik mol edi, onyń ústine Atyraý áýejaıynyń basshysy: «Qaıyrymdylyq reısimen kele jatqan Tý-154M ushaǵyna janarmaıdy eki ese qymbat baǵamen berińiz», dep tildeı qaǵazǵa óz qolymen jazyp, qolyn qoıypty da, ózi sol kúni ertemen Máskeýge ushyp ketipti. Sodan beri, mine, arada 20 jyl ótse de, osy oqıǵa, jany ashymastyq, jatbaýyrlyq kórsetken jannyń sol bir keleńsiz qylyǵy, tákappar minezi men áreketi meni áli kúnge deıin qat­ty qynjyltady... Mundaı qı­qar­lyqty osy saparymyzda «Qazaq­stan áýe joldary» ulttyq aksıo­nerlik avıakompanııasy basshysy orynbasarynyń tarapynan da baıqadyq. Jaǵdaıdy estı tura: «Biz qaıyrymdylyq sharasymen aınalyspaımyz...» dep betimizdi qaıtaryp tastaýy adamgershilikke jat, jaraspaıtyn qylyq edi. Átteń, amal qansha... dedik! Endi aıtaıyn degenimizge qaıta oralyp, sózimizdi túıindeıik. Negizinen, bizdiń qolymyzǵa qalam alýǵa túrtki bolǵan jáıt – elimiz­diń Birinshi hanymy Sara Alpys­qyzynyń balalarǵa, ásire­se, jetimderge jasap kele jat­qan sheksiz qamqorlyǵy. Kóp­shilik Sara apaıdyń ózin de, qaıratkerlik is-áreketterin de jaqsy biledi. Salamatty ómir súrip, densaýlyǵyn, óz-ózin kútip ustaý jolyn Sara apaıymyz únemi halyq arasynda nasıhattap keledi. Densaýlyqtarynda kináraty bar kishkene otandastarymyz – balalar úıi túlekterine degen yqylasy tipten bólek. Bolmys-bitimi kóp adamdarda kezdese bermeıtin jan jylýy men meıirimdiligimen erekshelenedi. Apaıymyzdyń boıynda azamattyq jáne analyq parasaty óte joǵary desem, qatelespeımin. Osy tusta analyq meıirimi áli esimnen ketpeıtin ózge de abzal jandarǵa qatysty birer jaıtty da ortaǵa sala ketkim keledi. Men mektepte oqyǵan kezde áke-sheshem sharýa adamdary bolǵandyqtan, kóbine qyrda turatynbyz. Soǵan baılanysty aýyl adamdarynyń úıinde, keıin onjyldyq mektep-ınternattyń jataqhanasynda jatyp oqyp, orta bilim alyp shyqqan túlekterdiń birimin. «Asharshylyqta jegen quıqanyń dámi aýzyńnan ketpeıdi» demekshi, sol kezde qamqor bolǵan muǵalim apaılarymdy áli kúnge deıin qadir tutyp kelemin, olar búginde el qurmetteıtin ardager jandar. Ári oqytýshym, ári tárbıeshim bolǵan Marfýǵa Ádıetqyzy jáne elge syıly Batyr ana – Jamal Býmashqyzy apaıymyzdyń bala tárbıesine kóńil bólýi, eńbekke baýlyp, adam qataryna qosýdaǵy tájirıbeleri óshpes ónege desem, qatelespeımin. Apaılarymyzdyń adam tárbıesindegi basty talaptary jigerlilik, ımandylyq jáne qanaǵatshyldyqty nasıhattaý edi. Osyndaı abzal da ónegeli batyr analarymyz áli aramyzda bar, bul kúnde olar eldegi aqjaýlyqty, ardaqty ájelerge aınaldy, Alla qýat bergeı, aman-saý bolyńyzdar! Áńgimemizdiń negizgi jelisine qaıta oralaıyq. Sonymen «Aza­mat» áýe kompanııasynyń sol bir kishkene eńbegi «Bóbek» qorynyń prezıdenti Sara Alpysqyzy Nazarbaevanyń tarapynan joǵary baǵalanyp, ol kisiden biz 1994 jylǵy shildeniń 27-si kúni alǵysy men ystyq yqylasy bildirilgen ashyq hatyn aldyq. Bul da jany elgezek jaqsynyń qaıyrymdylyqty qadirleı biletin kisilikti qasıetin kórsetse kerek. Osy oraıda sol kezdegi qaıy­rymdylyq saparymen ushqan «Azamat» áýe joldary mekemesine tikeleı kómegin tıgizgen Almaty, Oral jáne Atyraý áýejaı teh­nıkteri men ınjenerlerine jáne Qazaqstannyń aeronavıgasııa ujy­myna da alǵysymdy aıtyp, barshasyna zor densaýlyq, eń­bek­terine jemis tilegim keledi. Nurlan AQMUHANOV, birinshi synypty ınjener-ushqysh. ASTANA.