Jaqynda Qazaqstannyń Úndistandaǵy elshisi Dýlat Qýanyshev Kerala shtatynyń qarjy ortalyǵy – Kochın qalasynda Úndistannyń TMD elderimen saýda-ekonomıkalyq qarym-qatynastaryn damytý máseleleri boıynsha ótken dóńgelek ústelge qatysty. Atalǵan is-shara Úndistannyń Saýda, Syrtqy ister mınıstrlikteriniń qoldaýymen Úndistan Saýda-ónerkásip palatasy federasııasy tarapynan uıymdastyryldy.
Is-shara barysynda úndi kásipkerlerine ekijaqty yntymaqtastyqtyń jaǵdaıyna qatysty maǵlumattar berildi. Máselen, sońǵy úsh jyldyń ishinde Qazaqstan men Úndistan arasyndaǵy saýda kólemi eki esege artyp, onyń basqa barlyq Ortalyq Azııa elderimen salystyrǵandaǵy kólemnen de asyp túskendigi aıtyldy. Alaıda, qatysqan sarapshylardyń pikirleri boıynsha, atalǵan kórsetkish eki eldiń ekonomıkalyq áleýetine sáıkes kelmeıdi.
Sonymen qatar, Qazaqstan men Úndistan arasyndaǵy saýda jáne ınvestısııalyq baılanystardyń damýyna basty kedergi – eki el arasynda qolaıly tikeleı kólik joldarynyń joq ekendigi atap kórsetildi. Osyǵan oraı, Qazaqstandy Irannyń Parsy shyǵanaǵyndaǵy kemejaılarymen baılanystyratyn «Soltústik-Ońtústik» halyqaralyq kólik dáliziniń bóligi bolatyn temirjol tarmaqtarynyń mańyzdylyǵy talqylandy. Atalǵan temirjol baǵytyn paıdalaný júk tasymaldaý ýaqyty men shyǵynyn edáýir qysqartatyn bolady.
Qatysýshylardyń nazaryna Qazaqstannyń áleýmettik-ekonomıkalyq jaǵdaıy, memlekettik ındýstrııalyq-ınnovasııalyq damý baǵdarlamasynyń birinshi besjyldyqtaǵy negizgi nátıjeleri jáne Úkimettiń 2015-2019 jyldar aralyǵyndaǵy jobalary týraly aqparat jetkizilip, memleketimizdiń ınvestısııalyq múmkinshilikteri jaıly beınematerıal usynyldy.
Qazaqstannyń ınvestısııalyq ahýalyn jaqsartýǵa, ekonomıkanyń mańyzdy sektorlaryndaǵy ınvestorlardyń qyzmetin yntalandyrýǵa baǵyttalǵan zańdaǵy ózgerister asa qyzyǵýshylyq týǵyzdy.
Úndistan kásipkerleri Astanada ótetin EKSPO-2017 sheńberindegi jobalardy iske asyrýǵa belsendi qatysýǵa shaqyryldy, dep habarlady QR SIM-iniń baspasóz qyzmeti.