Sýretshiniń mindeti bireý ǵana – sezimniń til jetpeıtin qupııasyn, álemniń ishine jasyrǵan jumbaǵyn boıaý arqyly jetkizý. Týǵan jerge súıispenshiligi, Otanyna adaldyǵy, dástúrge beriktigi ol jazǵan shyǵarmadan sezilip tursa, ózgeshe pafospen, shynaıy romantıkamen beınelense, júreginiń lúpilin jetkize alǵany. Kásibı kompozısııa jasaýdyń has sheberi Záýre Smaǵulovanyń Á.Qasteev atyndaǵy Memlekettik óner mýzeıinde ótip jatqan «Azııa – altyn besigim» kórmesindegi týyndylar ultyn súıgen perzenttiń shynaıy peıilimen til qatady.
Kórmede gobelender, sándik kartınalar, abstraktili kompozısııalar, natıýrmorttar men peızajdar usynylǵan. Kúrdeli toqý tehnıkasymen tolǵaǵan alýan taqyryptaǵy týyndylar Záýreniń gobelen ónerinde ózindik stıli bar sýretshi ekenin baıqatady. Sýretshi shyǵarmashylyǵynda sheńber, spıral, aıqysh, tirshilik aǵashy sekildi pishinderdi paıdalana otyryp, kóshpeliler úshin qasterli sanalatyn «Jeruıyq» arqyly Uly dala dástúrine degen adal sezimin bildiredi. «Dala patshaıymy», «Qudaılardyń kúıreýi», «Qalyńdyq» atty gobelenderdiń kórkemdik mán-mátinindegi stıldengen sımvoldyq belgiler men oıý-órnekter dástúr sabaqtastyǵy men urpaqtar baılanysyn kórsetedi.
Sýretshi zamanaýı stılde biregeı týyndylar jasaıdy. Bul týyndylardan tamyljyǵan tabıǵattyń sulý kelbeti, keshki qalanyń saıabyr tapqan tynysy, teatr ómiriniń merekelik shadyman tirshiligi kórinedi. Boıaýdyń qanyqtyǵy men tústerdiń úılesimi jap-jaryq álemge qaraı jeteleı jóneledi. Azııalyq mádenıettiń shynaıy kórinisin dál beınelegen «Jyltyldaǵan juldyzdar», «Qala shamdary», «Shilde shýaǵy», «Aq jáne qara» abstraktili kompozısııalary barynsha yqshamdalǵan kórkem túıinmen, kereǵar tústermen erekshelenedi. Adamnyń bılep turǵan beınesine uqsas yrǵaqty ıilgen syzyqtar aqshyl sary, bozǵylt tústiń aıasynda aıqyn kórinis taýyp, «kúlli dúnıe ásemdik áleminde terbelip tursa» degen oıdy tuspaldaıdy.
Kórmede Záýre Smaǵulovanyń kógildir, kók, aqyq, kúmis-sur, zúbárjat tústi reńkterdi basty baǵdar ete otyryp, basqa da boıaýlar gammasyn sheber úılestirgen sándik kartınalary usynylǵan. Shyǵys oıý-órnegimen kómkerilgen kenepterde sımvoldyq keıipkerler, qumyralar, tabıǵat ásemdigi sýretshiniń ózine ǵana tán naqyshymen bıik deńgeıde beınelengen. Shyǵarmashylyq jańalyǵy mol mazmundy kórmeni tamashalaǵandar sýret sheberiniń sulý áleminen ózgeshe áser alary haq.
ALMATY