Oblys ortalyǵynda «Alash rýhanııatyndaǵy Maǵjannyń orny men qyzmeti» taqyrybyndaǵy respýblıkalyq konferensııa ótti, dep habarlaıdy Egemen.kz.
Aldymen jyrsúıer qaýymnyń nazaryna jan júregińdi shymyrlatyp, ult qamyn jegen ulylardyń kókiregindegi asyl arman, izgi murat ısharasy usynyldy. Myń qubylǵan zamanda sońynan ergen, medet tutqan alty Alashyn qalaı aman alyp shyǵýdy oılap, jar shetinde turǵan Kenesary beınesi. Azattyq jolyndaǵy arpalys. Sońǵy sheshim. Qaýmalaǵan qara bulttyń ar jaǵynan sebezgilep sáýle kórinedi.
Zaman almasqan. Kúni keshe alty Alashty sońynan ertýdi arman etken Kenesarydan keıin jalyndy jyrymen jarq etip Maǵjan shyǵady keńistikke. Alash aspany áli de túnerip tur. Aqyn júregin jaryp shyqqan jalyndy jyrlarymen áldılemek, kúreskerlik, qaıratkerlik rýhymen dem bermek, syrly sazymen jebemek. Konferensııany Sh.Ýálıhanov atyndaǵy Kókshetaý ýnıversıtetiniń rektory, belgili ǵalym Marat Syrlybaev ashyp, júrgizip otyrdy. Oblys ákiminiń birinshi orynbasary Eldos Ramazanov oblys ákimi Ermek Marjyqpaevtyń jyr alybyna degen iltıpatyna oranǵan júrekjardy quttyqtaýyn jetkizdi. Kókshege arnaıy kelgen fılologııa ǵylymdarynyń doktory, professor, Ulttyq ǵylym akademııasynyń akademıgi, alashtanýshy, saıası qýǵyn-súrgin qurbandaryn aqtaý jónindegi memlekettik komıssııanyń múshesi, «Qazaq gazetteri» seriktestiginiń bas dırektory Dıhan Qamzabekuly «Maǵjan tulǵasy jáne memleketshildik» atty mazmundy baıandama jasady. Sondaı-aq tarıh ǵylymdarynyń doktory, professor, Sáken Seıfýllın mýzeıiniń basshysy Marat Ábsemetov, belgili ǵalym Baqtybaı Jumadildın, kókshetaýlyq jazýshy-dramatýrg Jabal Erǵalıev, Sh.Ýálıhanov atyndaǵy Kókshetaý ýnıversıtetiniń oqytýshysy, ǵalym Erbolat Baıatuly, Astana qalasyndaǵy jastar teatrynyń aktery Meıirǵat Amangeldınder sóz sóılep, Maǵjan aqynnyń san qyryn ashyp kórsetti.
Sóz ónerin aıryqsha syılaıtyn Kókshe topyraǵynda árdaıym juldyzy joǵary Maǵjan aqynnyń bar murasy tolaıym halqymen qaıta tabysqan áserli de ádemi kesh boldy bul.