Atyraýda ult ustazy Ahmet Baıtursynuly atyndaǵy respýblıkalyq baıqaý ótti. Til saıasaty komıteti uıymdastyrǵan baıqaýǵa elimizdiń ár óńirindegi tilderdi oqytý ortalyqtarynyń oqytýshylary qatysty.
Úsh kezeńnen turatyn baıqaýǵa A.Baıtursynuly atyndaǵy Bilim akademııasynyń dırektory, ahmettanýshy, fılologııa ǵylymdarynyń kandıdaty Ulan Erkinbaı tóraǵalyq etti. Al qazylar alqasy bilikti pedagog-ádiskerler men ǵalymdardan quralǵan.
– Jyl saıyn ótetin bul baıqaýdyń basty maqsaty – ult ustazynyń ádistemelik eńbekterin zerdeleý arqyly tildi meńgertýge qatysty utymdy ádis-tásilderin nasıhattaý. Sondaı-aq oqytýshylardyń kásibı biliktiligin jetildirip, eresekterge qazaq tilin úıretýdiń sapasyn arttyrý, ózara tájirıbe almasý, – dedi Ulan Erkinbaı.
Baıqaýdyń alǵashqy kezeńinde qatysýshylar ózin jáne avtorlyq baǵdarlamasyn tanystyrdy. Budan soń otandyq jáne sheteldik tanymal ádiskerlerdiń sóıleýdiń 4 daǵdysyn úıretýge usynǵan tıimdi ádis-tásilderi men ádistemeleri, pikirleri týraly suraqtar berildi. Qatysýshylar uıashyqta jasyrylǵan qos suraqqa jaýap berdi. Úshinshi bólimde úmitkerler ózge etnos ókilderinen quralǵan topqa oqý, jazý, tyńdaý jáne aıtý túrlerine baılanysty tapsyrma berip, 20 mınýttyq dáris ótkizdi.
Qazylar alqasynyń sheshimimen baıqaýdyń bas júldesi men 500 myń teńgege Qyzylorda oblystyq tilderdi oqytý ortalyǵynyń memlekettik til oqytýshysy Gúljanat Dúzenova laıyq dep tanyldy. Birinshi orynnyń 350 myń teńgelik júldesin Jetisý oblystyq «Til» oqý-ádistemelik ortalyǵynyń memlekettik til oqytýshysy Janar Elesbaeva ıelendi. Ekinshi oryn men 250 myń teńge júldeni Aqtóbe oblysyndaǵy Tilderdi oqytý ortalyǵynyń ádiskeri Aqmaral Nurjanova men Qaraǵandy oblysynyń tilderdi oqytý ortalyǵynyń ádiskeri Mýnıra Aǵymbaeva jeńip aldy. Úshinshi orynnyń 200 myń teńgelik júldesine Jambyl oblysy Qordaı aýdandyq tilderdi oqytý ortalyǵynyń qazaq tili oqytýshysy Altynaı Áshimhan, Qostanaı oblystyq «Tildaryn» oblystyq tilderdi oqytý ortalyǵynyń ádiskeri Gúlmıra Kirikpenova, Aqmola oblystyq oqý-ádistemelik ortalyǵynyń oqytýshysy Aıman Jaqanova laıyq dep tanyldy. Sondaı-aq birneshe qatysýshyǵa yntalandyrý syılyǵy men 70 myń teńge berildi.
Atyraý oblysy