Otandyq «ApartX» startapyna «Big Sky Capital» jáne «Activat-VC» venchýrlyq qorynan 250 myń dollar ınvestısııa tartyldy. Bul ınvestısııalar startaptyń múmkindigin keńeıtip qana qoımaıdy, sondaı-aq naryqtaǵy ornyn nyǵaıtyp, jyljymaıtyn múlikti jalǵa berý óndirisindegi máselelerdi eńserýge jol ashady.
«Big Sky Capital» jáne «Activat-VC» bolashaǵy zor tehnologııalyq startaptardy ınvestısııalaýǵa mamandanǵan aýqymdy venchýrlyq qorlardyń qatarynda. Olar «ApartX»-tiń áleýetin baıqap, onyń jyljymaıtyn múlikti jalǵa berý naryǵynda jańa tásili men zor transformasııalyq kúshin moıyndady. Sonymen qatar «ApartX»-tiń menshik ıeleri men jalǵa alýshylardyń jaǵdaıyn jaqsartyp, jeńildetý mindetin tolyq qoldaıdy.
«Biz «ApartX» startapynyń negizin qalaýshy Qanat Keldibekovtiń jumysyn kópten beri muqııat qadaǵalap kelemiz. Osy ýaqyt aralyǵynda onyń boıynan ǵana emes, biregeı jobasynyń qurylymynan da bolashaqta keregi mol dúnıelerdi kórdik. Biz «ApartX» jobasy men onyń ınnovasııalyq tásiliniń áleýetine, óz mıssııasyn sátti júzege asyra alatynyna tolyq senemiz. «ApartX» jyljymaıtyn múlikti jalǵa berý salasyndaǵy jetekshi orynǵa ıe bolyp, jańa standarttar men ınnovasııalardy usynýǵa daıyn. Olar usynatyn «SaaS» sheshiminiń aýqymyn ózge naryqta qoldanýǵa bolady», dedi «Big Sky Capital» qorynyń basqarýshy seriktesi Ádil Nurǵojın.
«ApartX» startapyna tartylǵan qarjy kelesideı nátıjelerge qol jetkizýge jumsalady. Birinshi – tehnologııalyq damý. «ApartX» óz platformasyn odan ári jetildirýge kúsh salady. Investısııalardyń nátıjesinde startap ǵylymı zertteý jáne tájirıbelik jumystardy kúsheıtip, bilikti mamandardy tartyp, platformanyń fýnksıonaldyǵyn jaqsartady. Ekinshi – aýqymyn arttyryp, naryqty keńeıtý. «ApartX» jańa aımaqtarǵa enip, naryqtaǵy úlesin kóbeıtýdi josparlap otyr. «Big Sky Capital» qorynyń ınvestısııalary startapqa naryqtaǵy qatysýyn arttyryp, osy saladaǵy negizgi oıynshylarmen strategııalyq seriktestik ornatýǵa múmkindik beredi. Sondaı-aq Malaızııa, Indonezııa, Sıngapýr, Vetnam jáne Taıland elderiniń naryǵyna shyǵý josparlanyp otyr.
«Big Sky Capital» kompanııasynyń qomaqty ınvestısııasynyń qoldaýymen jyljymaıtyn múlikti jalǵa alýdyń qarapaıym ári qaýipsiz úderisi arqyly adamdar ómirin jaqsartýdy jalǵastyramyz. Osy rette Ádil Nurǵojın men Jan Qarsybaev sekildi seriktesterime rızashylyǵymdy bildiremin. Qor men onyń quryltaıshylary ınnovasııalyq jobalardy qoldap, olardyń tabysqa jetýine kómektesýde baı tájirıbege ıe. Bul ınvestısııa bizdiń áleýetimizdi kúsheıtip, ónimdi jaqsartý men komandamyzdy nyǵaıtýǵa járdemdesedi. «Big Sky Capital»-men birlese atqaratyn jumysymyz jańa bıikterdi baǵyndyrýǵa jáne jalǵa beriletin jyljymaıtyn múlik landshafyn ózgertýge jol ashady», deıdi «ApartX» startapynyń negizin qalaýshy Qanat Keldibekov.
«ApartX» – jalǵa beriletin múlikti qashyqtan basqarýǵa arnalǵan platforma jáne mobıldi qosymsha. Innovasııalyq startap menshik ıeleri men jalǵa alýshylar úshin «SaaS» sheshimin usynady. «ApartX» jalǵa alýshylar men menshik ıelerin baılanystyryp, jyljymaıtyn múlikti jalǵa alýdyń ınnovasııalyq sheshimin kórsetedi. Onyń múlikti jalǵa berýdegi biregeı tásili qazirdiń ózinde kópshiliktiń nazaryn aýdaryp, paıdalanýshylardyń oń baǵasyna ıe boldy.