Búgin magıstratýraǵa túsýge arnalǵan keshendi testileýge ótinish qabyldaý bastaldy, dep habarlaıdy Egemen.kz.
QR Ǵylym jáne joǵary bilim mınıstrligi usynǵan málimetke sáıkes, testileýge tirkelý Ulttyq testileý ortalyǵynyń app.testcenter.kz saıtynda 2023 jylǵy 15 shildege deıin ótedi.
Test tapsyrýshylarǵa ótinishterdi qabyldaý merzimi aıaqtalǵanǵa deıin, ıaǵnı 15 shildege deıin bilim berý baǵdarlamalarynyń tobyna, test tapsyrý tili men ornyna (qalasyna) ózgeris engizýge múmkindik beriledi.
Testileý orny men ýaqyty týraly aqparat 18 shildede ótinish berýshiniń jeke kabınetinde kórsetiledi. Keshendi testileýdiń ózi 20 shildede bastalyp, 10 tamyzǵa deıin jalǵasady.
«Keshendi testileý elektrondyq formatta ótkizilip, úsh bloktan turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Buǵan, jalpy alǵanda, 3 saǵat 55 mınýt beriledi. Shet tilin meńgergenin rastaıtyn halyqaralyq sertıfıkattardyń ıeleri shet tili boıynsha test tapsyrýdan bosatylady», dep túsindirdi Ulttyq testileý ortalyǵynyń dırektory Rýslan Emelbaev.
Aıta keteıik, bıyl ǵylymı-pedagogıkalyq magıstratýraǵa túsý úshin shekti ball – 75 ball, al beıindi magıstratýraǵa - 50 ball. Keshendi testileý nátıjelerimen kelispegen oqýǵa túsýshiler testileý aıaqtalǵannan keıin birden apellıasııaǵa ótinish bere alady.