Sháken Aımanov atyndaǵy «Qazaqfılm» kınostýdııasynyń «Qazaqanımasııa» shyǵarmashylyq birlestiginde Ámen Qaıdardyń 100 jyldyǵyna oraı Juldyzdar alleıasyndaǵy eskertkish memorıalyna saltanatty gúl shoqtary qoıyldy.
Is-sharaǵa otandyq anımasııa ardagerleri men qazaq anımasııasynyń damýyna eleýli úles qosqan otandyq mádenıet qaıratkerleri jınaldy. Kópshilik nazaryna 1967 jyly jaryq kórgen qazaq mýltıplıkasııasynyń alǵashqy týyndysy «Qarlyǵashtyń quıryǵy nege aıyr?» fılminiń sıfrlandyrylǵan nusqasy usynylyp, arnaıy kórme uıymdastyryldy. Kórmege anımasııa atasynyń ózi tutynǵan buıymdary, shyǵarmashylyǵyna paıdalanǵan jeke zattary qoıyldy.
Ámen Qaıdar – qazaq anımasııasynyń negizin qalaýshy. Ol Kınematografıster odaǵynyń hatshysy, keıin Sýretshiler odaǵynyń tóraǵasy qyzmetin atqardy. «Qurmet belgisi», «Parasat» ordeniniń, III dárejeli «Barys» ordeniniń, «Altyn Adam» syılyǵynyń ıegeri, Qazaq KSR Memlekettik syılyǵynyń laýreaty.
Qazaq mýltıplıkasııasynyń tarıhy qoıýshy-rejısser Ámen Qaıdardyń 1967 jyly túsirgen «Qarlyǵashtyń quıryǵy nege aıyr?» atty tuńǵysh fılminen bastaý aldy. Mýltfılm 48 elde kórsetilip, Lenıngradtaǵy III Búkilodaqtyq kınofestıvaldiń laýreaty atanyp, mýltfılmder kınofestıvalinde qurmetti orynǵa ıe boldy. Sondaı-aq Ámen Qaıdardyń tanymal anımasııalyq jumystary qatarynda «Aqsaq qulan», «Quıyrshyq», «Qojanasyr – qurylysshy», «Kún shaǵylysy», «Sıqyrly kilem» mýltfılmderi bar.
О́tken jyly qazaq anımasııasyna 55 jyl toldy. Osy jyldar ishinde eki júzge jýyq mýltfılm túsirilip, otyzdan astam anımasııalyq stýdııa ómirge keldi. 2018 jyly anımasııalyq kınostýdııalar qaýymdastyǵy qurylyp, óz kezeginde bul uıym rýhanı-mádenı mańyzy bar ıgilikti is-sharalardyń basynan tabyldy. Sonyń ishinde jyl saıyn uıymdastyrylatyn Halyqaralyq «Amen animation film festival» aıryqsha oryn alady.
Sonymen qatar qazaq anımasııalyq kıno óneriniń atasy Ámen Qaıdardyń týǵanyna bir ǵasyr, ıaǵnı 100 jyl tolýyna oraı «Qazaqanımasııa» shyǵarmashylyq birlestiginde Mádenıet jáne sport mınıstrliginiń tapsyrmasymen, Ulttyq kınony qoldaý memlekettik ortalyǵynyń qoldaýymen túsirilgen «Ámen aǵanyń báıteregi» atty qysqametrajdy mýltfılminiń alǵashqy kórsetilimi ótti.
ALMATY