«Balany jastan» degen sóz beker emes. Onyń jaqsy bolmaǵy kishkentaıynan alǵan tárbıesine baılanysty.
Maǵjan Jumabaev «Pedagogıka» kitabynda balanyń minez-qulyǵyna úıdegi tártip pen mekteptegi tártiptiń tikeleı áser etetinin aıtady.
«Úı hám mekteptegi tártip qubylmaly bolmasyn, ıaǵnı ata-ananyń, muǵalimniń kúıine qarap tártip ózgerip otyrmasyn. Tártip ózgermeıtin izgi qulyq zańdaryna negizdelgen bolsyn. Bolmasa, búgin jaraǵan is erteń jaramaıtyn bolyp otyrsa, balada tárbıeshige senim qalmaıdy. Bul – bir. Ekinshi, balanyń jaratylysy, tabıǵaty tileıtin nárseden balany tyıý durys emes. Júgirýden, oıynnan tyıý syqyldy. Balanyń jaratylysy tileıtin nárseden tyısań, bala bul jasama tártipti op-ońaı buryp ketedi. Iаǵnı bala ótirik aıtýǵa, aldaýǵa úırenedi. Balanyń ótirik aıtýy, aldaýy ony jasama tártip ishine qamaýdan. Mańaıyndaǵy tártip, turmystyń qurylysy balanyń jaratylysyna qaıshy bolsa, bala ondaı tártipti attap ótedi. Úshinshi, tárbıeshi men balanyń arasy óte jaqyn bolýǵa tıisti. Ekeýi birine-biri shet, jat dep qaramasyn. Ekeýiniń arasynda senbeýshilik bolmasyn. Bala tárbıeshini muńyn tarqata alǵandaı, qýanyshyna ortaqtasa alǵandaı, syryn sheshe alǵandaı dosym dep bilsin. Bala tárbıeshini osylaı dep bilse, ol ýaqytta odan eshbir oıyn, eshbir isin jasyrmaıtyn bolady. Jasyrmaıtyn bolsa, ótirik aıtý, aldaý syqyldy unamsyz qulyqtarǵa oryn da qalmaıdy», deıdi Maǵjan Jumabaev.