Parıjdegi Rolan Garros týrnırinde Qazaqstannyń tennısshileri sátsiz óner kórsetkeni jaıynda biz buǵan deıin de habarlaǵanbyz.
Desek te bizdiń sportshylar bul jarystan quralaqan oralǵan joq. Fransııanyń bas shaharyna sapar shekken jeti jerlesimizdiń esepshotyna túsken qarajattyń jalpy kólemi 485 myń eýrony qurap otyr. Eń kóp oljaǵa kenelgen Iýlııa Pýtınseva. 28 jastaǵy oıynshy jekelegen saıystyń úshinshi kezeńine shyqqany úshin 142 myń eýro alsa, juptyq básekeniń alǵashqy aınylamynda óner kórsetkeni úshin 8,5 myńdy qaltaǵa basty. Barlyǵy – 150,5 myń eýro. Teńgege aýdarsaq bul 72,7 mıllıondy quraıdy. Densaýlyǵynyń syr berýine baılanysty úshinshi kezeńnen keıin jarysty jalǵastyrýdan bas tartqan Elena Rybakına 142 myńdy (jekelegen saıys) mise tutty. Al ózge tennısshilerimizdiń tabysy mynadaı: Aleksandr Býblık – 77,5 myń (jekelegen saıys – 69 myń, juptyq báseke – 8,5 myń), Tımofeı Skatov – 69 myń (jekelegen saıys), Aleksandr Nedovesov – 21,5 myń (juptyq báseke), Anna Danılına – 16 myń (juptyq báseke – 13,5 myń, mıks – 2,5 myń) jáne Andreı Golýbev – 8,5 myń eýro.