4 maýsym – Memlekettik rámizder kúnine oraı Shymkentte merekelik is-sharalar uıymdastyryldy. Osynaý aıtýly kúni qalanyń Táýelsizdik saıabaǵynda saltanatty jıyn ótip, oǵan shahardyń barsha zııaly qaýym ókilderi, áskerıler, kúshtik qurylym basshylyǵy, depýtattar, eńbek ardagerleri, jastar men túrli qoǵamdyq uıym músheleri qatysty.
Osy kúni memleketimizdiń eldigin aıǵaqtaıtyn rámizderi ulyqtalyp, ol tý kóterý rásimimen jalǵasty. Ulyq merekege oraı saıabaqtaǵy Rámizder alańynda arnaıy konserttik kesh ótip, jınalǵan dúıim jurttyń kóńil kúıin bir serpiltti. Jergilikti óner ordasynan quralǵan ánshiler quıqyljyta án salyp, merekeniń qyzyqty ótýine úles qosty. Ásirese shyrqalǵan patrıottyq ánder halyqtyń rýhyn oıatyp, tula boıyn shymyrlatty. О́nerpazdarmen birge ardagerler de qosyla patrıottyq ánderdi oryndap, aınala tegis án-jyrǵa bólendi. Áskerı orkestr mýzykanttarynyń da óneri kópshiliktiń kóńilinen shyqty. Merekelik is-sharanyń sońy avtosherý men velosherýge ulasty. 50 avtokólik pen 80 velosıpedshi Kók týmen birge Ordabasy alańynan Báıdibek bı eskertkishine deıin qala kóshelerimen júrip ótip, kópshilik qaýymǵa memleketimizdiń rámizderine degen qurmettiń asqaq úlgisin pash etti. Bir aıta keterligi, saltanatty keshke qatysqan árbir qala turǵynynyń qolynda bir-bir kók týdan boldy. Osynyń ózi halqymyzdyń memlekettik nyshandarǵa syı-qurmetiniń bólek ekenin aıǵaqtap tursa kerek.
Merekelik sharany tamashalaýǵa kelgen belgili azamattar memlekettik rámizderdiń mańyzyna, urpaq tárbıesindegi róline qatysty óz pikirlerin bildirgen bolatyn. Sonyń ishinde esimin tegis el biletin áıgili sportshy Mahmud Sabyrhan da óz oıyn ortaǵa saldy.
«Qazaq halqynyń óz eliniń naǵyz patrıoty ekenin, memlekettik nyshandardy erekshe qasterlep, qadir tutatynyn keshegi ótken Tashkenttegi bokstan álem chempıonatynda anyq baıqadym. Sol kezde trıbýna tolǵan halyq Ánurandy jalǵaı ketip, jandy daýyspen bir kisideı qosyla shyrqaǵanda boıymdy alapat kúsh kernep, kózime ystyq jas keldi. О́zimdi osy sát dúnıedegi eń baqytty adamdaı sezindim. Qazaq eliniń azamaty bolyp týǵanym úshin taǵdyrǵa ishteı rızashylyǵymdy bildirdim. Eń baqytty shaǵym osy shyǵar dep qýanyshtan júregim jaryla jazdady. Maǵan qoldaý bildirip, ulttyq sana-sezimniń joǵary ekenin dáleldep, búkil álemge tamashalatqany úshin qazaq halqyna myń alǵys aıtamyn. Elimniń yntymaǵy men birligi, uıymshyldyǵy sol jerde anyq kórindi. Endigi rette jastarǵa ásirese sportshylarǵa aıtarym, Ánuranymyzdy dúnıejúzilik dodalarda kópshiliktiń aldynda shyrqatyp, kók Týymyzdy jelbirete bereıik», dedi bylǵary qolǵaptan álemniń talaı dodalarynan top jaryp kelgen batyr ul.
«Shymkent qalasy kásipodaqtar ortalyǵy» aýmaqtyq kásipodaqtar birlestiginiń jáne qalalyq qoǵamdyq keńestiń tóraǵasy Baýyrjan Álteev te jınalǵan jurshylyqty aıtýly merekemen quttyqtap, bul meıramnyń rasymen de jóni bólek ekeni jóninde pikirin bildire ketti.
«Negizi, búgin – biz úshin tarıhı kún. Sebebi el bolamyn deseń birinshi kezekte shekarany bekitý kerek. Sonymen birge Qazaqstannyń táýelsiz, derbes el ekenin dáleldeıtin Qudaıǵa shúkir Týymyz, Eltańbamyz, basqa da rámizderimiz bar. Osy nyshandardyń barlyǵy ulttyń boıynda patrıottyq sezimdi oıatatyn dúnıeler. Endigi mindet osylardy óskeleń urpaqqa dáripteı berý kerek. Al bul jaýapkershilikti alyp júrý aǵa býyn urpaqtyń moınyndaǵy paryz dep bilemiz. Ásirese jelbirep turǵan kók týymyzǵa qurmet erekshe bolýǵa tıis. Qaı jerde bolsyn baıraǵymyzdyń tómen túsýine, qurmetsiz qalýyna jol bermeýimiz kerek. Osyny mektepterde, joǵary oqý oryndarynda shákirtterge barynsha túsindirgen jón. Iаǵnı Tý men Eltańba jaı ǵana mekemeniń mańdaıshasynda, qabyrǵada ilinip turǵan zat emes. Ol bizdiń rýhymyz, eldigimizdiń nyshany ekenin jas urpaq sanasyna sińdire bilýimiz qajet. Tipti balabaqshalarda kúndelikti tańerteń Ánuranmen bastalyp, balalar tárbıeleıtin jaıda Kók týymyz ben Eltańbamyzdyń bolýy izimizdi basyp kele jatqan jas urpaqtyń patrıottyq rýhta tárbıelenýine muryndyq bolary sózsiz.
Sodan soń árbir rámizge bólek bas ıýimiz kerek. Árqaısysynyń óziniń bólek qurmeti bar. Sony umytpaıyq. Meniń óz basym shetelge shyqsam Qazaqstannyń memlekettik nyshandary beınelengen sporttyq kıimderin kıip alamyn. Tipti jolǵa shyǵarda alyp shyǵatyn sómkemde de kók Týymyzdyń sýreti turady. Sonda meni kórgen sheteldikter elimizdi tanyp, «Qazaqstan» dep kúlimsireı qaraıdy, men «ıá» dep marqaıa jaýap beremin. Osynyń ózi meniń patrıottyq sezimimdi oıatyp, rýhymdy kóteredi. Sondyqtan árbir azamatymyz qaıda júrse de óziniń qazaqtyǵyn tanytyp júrse, menińshe dúnıe júziniń aldynda elimizdiń azamattary qandaı ultjandy, patrıot ekenin tanytar edi. Osy rette bizdiń sportshylarymyzǵa úlken rahmet. Aralas jekpe-jek, olımpıadalyq sport túrleri bola ma, jeńis tuǵyrynan kórinip, álemge Qazaqstandaı el bar ekenin tanytyp júr. О́zge halyqqa qazaqtyń kim ekenin bildirý úshin de jeńiske umtylý patrıottyq rýhtyń bir ólshemi dep uǵynamyn. О́z basym árbir halyqaralyq jarysta Ánuranymyz shyrqalyp, kók Týymyz bıikke órlegenin kórgende ishteı kóńilim tolqyp, boıymdy keremet shattyq sezimi kerneı túsedi. Budan asqan baqytty sát bar ma?! Halqymyz aman bolsyn, Rámizder kúni qutty bolsyn!» dedi ol.
«Búgin barlyq otandas úshin erekshe kún. О́ıtkeni elimizdiń barsha jurty Qazaqstan Respýblıkasynyń rámizderi kúnin atap ótip jatyr. Meniń oıymsha elim, jerim deıtin árbir memlekettiń patrıot azamaty osy kúni kók Týymyzdy kókke jelbiretip, Eltańbamyzdy joǵary ustap, Ánuranymyzdy bir shyrqap qoıýy qajet», dedi jyly lebizin arnaǵan tanymal opera ánshisi Úralhan Seıilbekova. – Sebebi ózimizdiń memlekettik nyshandarymyzdy ózimiz ulyqtap, qadir tutpasaq, basqa eshkim olardy ulyqtamaıdy. Bir qýanarlyǵy búginde kishkentaı baladan, eńkeıgen qarııaǵa deıin mańyzdy jıyndarda Ánuranymyzdy jatqa aıtyp turǵanyn kóremiz. Men ózim ánshi bolǵandyqtan kóp jıyndarda óner kórsetemin. Sonda kóptegen ándi oryndaımyn. Alaıda jaı ánderdi shyrqaýda bólek sezim de memlekettik Ánuranymyzdy qolymdy júregime qoıyp oryndaǵanda basqasha kóńil kúıde bolamyn. Jan dúnıem eljirep, maqtanysh sezimi boıymdy kernep, ózimdi qustaı samǵap bara jatqandaı sezinemin. Ásirese senimen birge halyq ta qosyla ketkende ózimdi Qazaqstannyń eń qasıetti rámiziniń biri Ánurandy úlken sahna tórinen shyrqaý baqyty buıyrǵanyna Qudaıǵa myń da bir táýbe deımin. Bul jerde kórermendi de, meni de ánge bas ıdirip turǵan ónerdiń jeke-dara ózi emes, elimizdiń rýhyn asqaqtatar Ánurany men soǵan degen qurmet.
Sonymen birge osyndaı aıtýly merekede árbir el azamatynyń qolynan kishkentaı týdy alyp júrgenin kórgende eriksiz rahat sezimge bólenesiń. Patrıottyq rýh barda memleket eshqashan qaýip-qaterge basyn tikpeıtinine, qandaı qıyn jaǵdaı bolsa da halyqtyń yntymaǵy men birligi odan aman alyp shyǵatynyna kámil senimde júresiń. Men úshin bul merekeniń mańyzy men syry osynda jatyr dep oılaımyn. Iаǵnı halyqqa elimizdiń rámizderin qurmetteýdi dáripteý arqyly boılaryna patrıottyq súıispenshilik uryǵyn sebý, osylaısha otansúıgishtik sezimdi kúsheıtip, eldiń birligin bekemdeý yntymaǵyn arttyrý maqsaty jatqanyn ańǵaramyn. Sonymen birge kóptegen mekemeniń qaq mańdaıynda kók Týymyz jelbirep turady. Kúnniń ystyǵy men sýyǵy, jeldiń óti bar degendeı, ýaqyt óte kele syrtqa ilingen Tý da eskirip tozady. Sonyń úshin árbir memlekettik mekeme baıraǵymyzdy sánin ketip qalmaýyna erekshe yjdaǵattylyqpen nazar aýdaryp otyrsa degen izgi tilegimdi jetkizgim keledi».
Memlekettik rámizder kúnin toılaý megapolıste bir kúnin buryn bastaldy desek qatelespeımiz. О́ıtkeni sol kúni keshke Qajymuqan atyndaǵy Ortalyq stadıonynda fýtboldan Qazaqstan chempıonatynyń aıasynda «Ordabasy» men «Atyraý» komandalary arasynda kezekti oıyn ótken. Sol jarysta kók Týymyz jelbirep, stadıonǵa jınalǵan 23 myń fýtbol jankúıeri qoldaryn kókiregine qoıyp tanymal opera ánshisi Maıra Muhamedqyzymen birge Ánurandy shyrqady. Shymkent qalasynyń ákimi Murat Áıtenov te óz komandasyna jankúıer bolyp, qoldaý kórsetti. Osylaısha, jerlesterinen úlken demeý men qýat alǵan «ordabasylyqtar» oıynda shapshańdyq pen belsendilik tanytyp, Qazaqstan Premer-lıgasyndaǵy jarysta kezekti jeńisterine qol jetkizdi.
ShYMKENT