Bıyl qańtar-sáýir aralyǵynda sút ónimderiniń óndirisi 173,8 mlrd teńgege jetip, byltyrǵy kórsetkishten 32,9 paıyzǵa asyp tústi. О́ńirlik bóliniste óndiris turǵysynan Soltústik Qazaqstan oblysy alǵa shyqty. Ondaǵy óndiris kólemi 31,7 mlrd teńgege jetip, jyldyq ósim 52,3 paıyzdy qurap otyr. Ekinshi orynda Almaty oblysy. Shyǵarylǵan ónim kóleminiń somasy – 30,4 mlrd teńge, al ósý kórsetkishi – 28,5 paıyz. Úshinshi orynda Qostanaı oblysy – 24,6 mlrd teńge jáne 76,6 paıyz.
Sút ónimderi arasynda balmuzdaq óndirisiniń bási bıik bolyp tur. «Tátti muzdaq» óndirý 12,5 myń tonnaǵa deıin artqan. Sondaı-aq ósimdik maıy men spred óndirisi de alǵashqy pozısııada. О́ńdelgen suıyq sút pen kilegeı óndirisi 5,3 paıyzǵa, 199,6 myń tonnaǵa artsa, syr men súzbe óndirisi – 0,4 paıyzǵa, 12,5 myń tonnaǵa kóbeıgen. Bul rette qatty kúıdegi sút óndirisi (54,6 paıyzǵa, 1,1 myń tonnaǵa deıin), sondaı-aq ıogýrt, ashytylǵan sút pen kilegeı (1,3 paıyzǵa, 76,2 myń tonnaǵa deıin) óndirisinde tómendeý baıqalady. Alaıda ashytylǵan sútti sýsyndar segmentinde qymyz (65,4 paıyzǵa, 964 tonnaǵa deıin) jáne shubat (21,1 paıyzǵa, 1000 tonnaǵa deıin) óndirisi ósti.
Energyprom málimeti boıynsha 2023 jyly qańtar-aqpanda jergilikti kompanııalar sút ónimderine degen suranysty 85 paıyzǵa (byltyrǵy deńgeıde) qanaǵattandyrǵan. Import kólemi 8,2 paıyzǵa, 26,4 myń tonnaǵa ósti. Barlyq derlik ónim (170,7 myń tonna) ishki naryqta satylǵan. Tek 4,6 myń tonna ónim ǵana eksportqa jiberilgen.
О́ńdelgen sút pen kilegeı segmentinde kompanııalar suranysty 94,6 paıyzǵa ótegen. Import bir jylda 45,9 paıyzǵa, 5,5 myń tonnaǵa artqan. Ishki naryqta 101,8 myń tonna ónim satylsa, eksportqa 1 myń tonna sút shyǵarylypty.
Sarapshylar qazir otandyq sút naryǵynda daǵdarys ornap turǵanyn aıtady. Qazaqstan jyl saıyn 700 mln dollardyń ónimin ımporttaıdy. Aýyl sharýashylyǵy mınıstrligi máseleni jańa jobalardy júzege asyrý arqyly sheshkisi keledi, biraq odan da qarjyny qazirgi jumys istep turǵan kásiporyndarǵa baǵyttaý tıimdi bolar edi deıdi olar.