Almaty oblysy polısııa departamentiniń burynǵy basshysy Serik Kúdebaev ózine qatysty sot úkimine apellıasııalyq shaǵym túsirdi, dep habarlaıdy Egemen.kz.
Jetisý oblystyq sotynyń baspasóz qyzmeti usynǵan aqparatqa sáıkes, Serik Kúdebaev sot úkimine apellıasııalyq shaǵym túsirgen.
«Serik Kúdebaevtyń ústinen qozǵalǵan qylmystyq is boıynsha apellıasııalyq shaǵym 29 maýsym saǵat 15:00-de Jetisý oblystyq sotynda qaralady dep belgilendi», delingen oblystyq sot habarlamasynda.
Eske sala ketsek, osy jyldyń 28 sáýirinde Serik Kúdebaev 10 jylǵa bas bostandyǵynan aıyryldy.
Ol sottaǵy sońǵy sózinde óz kinásin moıyndaýdan bas tartqanyn aıta ketý kerek.
«Men kináli emespin. Halqyma oq atpadym. Azaptaý bolmady. Taǵylǵan aıyptar sotta dálelin tappady», dedi Serik Kúdebaev.