Memleket basshysy Sheteldik ınvestorlar keńesiniń otyrysynda sóz sóıledi, dep habarlaıdy Egemen.kz Aqordanyń baspasóz qyzmetin silteme jasap.
«Geosaıası shıelenis pen proteksıonızmniń beleń alýy álemdik ekonomıkany ózgertip jatyr. Bul ekonomıkany baıaýlatyp qana qoımaı, jahandyq ósim men turaqtylyqqa kedergi keltiredi. Alaıda kez kelgen daǵdarys jańa múmkindikke jol ashatynyn ýaqyt kórsetti.
Orasan zor tehnologııalyq serpin beretin «sıfrlandyrý» osyndaı múmkindiktiń biri dep sanaımyz. Sıfrlandyrý qarqyny ekonomıkanyń damýyna zor yqpal etip, búgingi kún tártibiniń baǵyt-baǵdaryn aıqyndap berdi», dep atap ótti Qasym-Jomart Toqaev.
Prezıdenttiń aıtýynsha, jasandy ıntellekt, blokcheın, Internet zattar (IoT) jáne Úlken derekter (Big Data) sekildi jańa tujyrymdar men tehnologııalardy keń kólemde engizý aýyl sharýashylyǵynan bastap qarjy salasyna deıin barlyq saladaǵy oıyn erejesiniń ózgerýine alyp keledi.