Senat spıkeri Máýlen Áshimbaev EQYU Parlamenttik Assambleıasynyń Tóraǵasy Margareta Sederfeltpen kezdesti, dep habarlaıdy Egemen.kz Senattyń baspasóz qyzmetine silteme jasap.
О́z sózinde Palata Tóraǵasy Margareta Sederfeltke Senattyń shaqyrýyn qabyl alyp, Qazaqstanǵa kelgeni jáne Astana halyqaralyq forýmyna qatysqany úshin alǵys bildirdi. Sondaı-aq Parlamenttik Assambleıanyń jahandyq deńgeıde qaýipsizdik pen yntymaqtastyqtyń negizgi máselelerin sheshýdegi mańyzdy róline toqtaldy. Máýlen Áshimbaev Senat Shvesııa Rıksdagymen tyǵyz baılanysty damytýǵa múddeli ekenin de bildirdi.
«Qazaqstan Parlamentiniń eki Palatasynda da Shvesııamen dostyq toptary jumys isteıdi. Shvesııa Parlamentinde Ortalyq Azııa parlamentterimen Dostyq qaýymdastyǵynyń qurylýyn quptaımyz. Biz osy toptardyń áleýetin jandandyryp, EQYU Parlamenttik Assambleıasy men Parlamentaralyq Odaq sheńberindegi kópjaqty yntymaqtastyqty nyǵaıtýymyz kerek dep esepteımiz», dedi Senat Tóraǵasy.
Sonymen qatar Palata Spıkeri Shvesııa Qazaqstannyń Soltústik Eýropadaǵy mańyzdy ekonomıkalyq seriktesi ekenin atap ótti. Soǵan baılanysty ol ǵylym, bilim berý, óndirýshi ónerkásip, densaýlyq saqtaý, aqparattyq-kommýnıkasııalyq tehnologııalar, turaqty damý jáne energetıka salalary boıynsha yntymaqtastyqty keńeıtý jónindegi usynystarymen bólisti.
Máýlen Áshimbaev EQYU PA mıssııasynyń Qazaqstanda ótken parlamenttik saılaýlardy baqylaýǵa qatysqany úshin Margarete Sederfeltke rızashylyǵyn bildirdi. Sondaı-aq Memleket basshysynyń bastamasymen iske asyrylyp jatqan reformalardy zańnamalyq turǵydan qamtamasyz etý baǵytynda Parlament júrgizip otyrǵan jumystarǵa nazar aýdardy.
О́z kezeginde EQYU PA Tóraǵasy Qazaqstan Prezıdenti Qasym-Jomart Toqaevtyń basshylyǵymen elimizde júzege asyrylyp jatqan saıası ózgeristerdiń qarqynyn oń baǵalap, ózara yntymaqtastyqty odan ári nyǵaıtýǵa daıyn ekenin bildirdi.
Odan bólek, suhbattasýshylar Astana halyqaralyq forýmynyń kún tártibindegi negizgi taqyryptardy, onyń ishinde klımattyń ózgerýi, azyq-túlik daǵdarysy men energetıkalyq qaýipsizdik máselelerin talqylady.