Jetisý jeri – syrtqy saýda aınalymynyń bir oshaǵy. Sondyqtan óńirge sheteldik mamandardyń qyzyǵýshylyǵy kúnnen-kúnge artyp keledi. Osy rette «Altynkól» stansasy men «Altynkól-jol» keden beketiniń jumysymen tanysýǵa Qytaı Halyq Respýblıkasynan arnaıy delegasııa keldi. Olar bekettiń ınfraqurylymyna oń baǵa berdi.
Delegasııa quramynda Bas konsýl Szıan Veı, saýda-ekonomıkalyq máseleler boıynsha konsýl Lıýı Ansı, sondaı-aq elimizdiń Syrtqy ister mınıstrligi Almaty qalasy ókildigi basshysynyń orynbasary Islambek Raımov, mınıstrdiń keńesshisi Rýslan Iskakov boldy.
Kezdesý barysynda delegasııa múshelerin «Qazaqstan temir joly» «Almaty» JShS fılıaly júk tasymaly bólimshesiniń bastyǵy Nurym Janııazov pen «Altynkól» stansasynyń dırektory Qýanysh Jaqsybek temirjol ótkeliniń perspektıvalyq damý josparlarymen tanystyrsa, Jetisý oblystyq memlekettik kirister departamenti basshysynyń orynbasary Nurlan Baımýldınov pen «Altynkól-jol» keden beketiniń basshysy Arman Qojasbaev kedendik tekserý men rásimdeý sharalaryndaǵy ıntegrasııalyq úılesim, elektrondyq deklarasııalaý jáne táýekeldi basqarý úderisteri týraly aıtty.
«Jarkent jerindegi «Altynkól» stansasy – elimizdiń ońtústik-shyǵysyndaǵy Eýropa men Azııanyń arasyn jalǵastyryp turǵan eń úlken temir jol ótkeli. Sebebi «Altynkól» stansasy qurylǵan on jyldan astam ýaqyt ishinde eki el arasyndaǵy kólik qatynasy men taýar aınalymy birneshe ese artyp otyr. Atap aıtsaq, bıylǵy bes aıda eki el arasyndaǵy kólik qozǵalysy ótken jyldyń osy merzimimen salystyrǵanda – 131, eksporttyq áleýet – 279, tranzıttik taýar tasymaly 20 paıyzǵa artty», deıdi Jetisý oblysy boıynsha Memlekettik kirister departamenti «Altynkól-jol» keden beketi basshysynyń orynbasary Beken Nurahmetov.
Onyń aıtýynsha, ımporttalǵan taýardyń kedendik quny 466 mıllıon 492 myń (salmaǵy 131 752 t), eksporttalǵan taýardyń kedendik quny 4 mlrd 325 mln (salmaǵy 1 849 840 t), tranzıttik taýardyń kedendik quny 10 mlrd 410 mln dollardan (salmaǵy 2 168 459 t) asqan. Oǵan qosa atalǵan temirjol ótkeli arqyly taýar tasymaldaýǵa múddeli elderdiń sany qyryqtan asqanyn aıta ketkenimiz artyq bolmas. Onyń ishinde TMD elderi ǵana emes, damyǵan Eýropa men Ońtústik Shyǵys Azııa memleketteri de bar. Mysaly, ekonomıkasy damyǵan Shvesııa, Shveısarııa, Fransııa, Fınlıandııa, Chehııa, Slovakııa, Sıngapýr, Italııa, Aýstrııa, Germanııa, Norvegııa, Ispanııa, Italııa, t.b. elderge jóneltiletin tranzıttik tasymal da kún saıyn artyp keledi.
Kezdesýde bolashaqta eki el arasyndaǵy syrtqy ekonomıkalyq qatynastar negizinde tranzıttik áleýetti damytýǵa, ınvestısııalyq jobalardy kóbeıtýge jáne keıbir problemalyq máselelerge baılanysty ózekti áńgimeler qozǵaldy. Sondaı-aq delegasııa «Altynkól-jol» keden beketinen keıin «Nur joly» jáne shekara mańy halyqaralyq yntymaqtastyq ortalyǵy «Qorǵas» keden beketteriniń de jumysymen tanysty.
Jetisý oblysy