Premer-mınıstr Álıhan Smaıylov Tótenshe jaǵdaılar mınıstrliginiń ujymyna jańa basshy – Syrym Sháriphanovty tanystyrdy, dep habarlaıdy Egemen.kz.
«Premer-mınıstr vedomstvonyń aldynda azamattyq qorǵaý salasyndaǵy Memleket basshysy men Úkimet belgilegen birqatar mańyzdy mindet turǵanyn atap ótti. Bul rette qazirgi ýaqytta Abaı oblysyndaǵy iri tabıǵı órtti oqshaýlaý jáne joıý asa mańyzdy», delingen Úkimettiń baspasóz qyzmetiniń habarlamasynda.
Sondaı-aq Álıhan Smaıylov mundaı jaǵdaılardyń aldyn alý úshin arnaıy sharalardy oryndaý deńgeıin arttyrý mańyzdy ekenin atap ótti.
«Siz búkil prosesti úılestirip otyrýyńyz kerek. Bul iri órtterdiń aldyn alý jáne sý tasqyny máselelerine de qatysty. Biz osyndaı iri tótenshe jaǵdaılardyń aldyn alý úshin qajetti sharalardyń barlyǵyn qabyldap otyrýymyz kerek. Azamattyq qorǵaý organdarynyń jumysy men jyldamdyǵyna kóp nárse baılanysty», dedi Álıhan Smaıylov.
Esterińizge sala keteıik, Memleket basshysy búgin Tótenshe jaǵdaı mınıstri Iýrıı Ilındi qyzmetinen bosatty. Onyń ornyna Syrym Sháriphanovty taǵaıyndaǵan edi.