Almaty jurtshylyǵy kórnekti memleket jáne qoǵam qaıratkeri Berdibek Mashbekuly Saparbaevty aqtyq saparǵa shyǵaryp saldy. Abaı atyndaǵy Qazaq ulttyq akademııalyq opera jáne balet teatry ǵımaratyna jınalǵan zııaly qaýym bederli jyldar belesinde el damýyna eleýli úles qosqan tulǵanyń qaıratkerlik qyry, kásibı biligi, azamattyq kelbetine toqtalyp, jaqyn-jýyǵyna kóńil aıtty. Qoshtasý rásimine qoǵam qaıratkerleri, Úkimet músheleri, birqatar aımaqtyń ákimderi, Parlament depýtattary, mádenıet, sport, basqa da salalardyń ókilderi qatysty.
Jetpis bir jasqa qaraǵan shaǵynda ómirden ozǵan memleket qaıratkeriniń qazasyn qalyń jurt qaıǵyra qabyldady. Qaraly jıyndy ashqan Úkimet basshysy Álıhan Smaıylov Prezıdent Qasym-Jomart Toqaevtyń kóńil aıtý jedelhatyn oqydy.
«Berdibek Mashbekuly uzaq jylǵy eseli eńbek jolynda laýazymdy qyzmetterdi abyroımen atqaryp, elimizdiń saıası-ekonomıkalyq, áleýmettik-mádenı órkendeýine jáne óńirlerdi damytýǵa mol úles qosqan edi. Memleketimizdiń syndarly saıasatyn zor biliktilikpen júrgize bildi. Qazaqstannyń bedeli men mártebesiniń arta túsýine qajyr-qaıratyn jumsady. Azamattyq qadir-qasıetimen el ishinde qurmetke bólendi. Sońyna óshpes iz qaldyrǵan Berdibek Mashbekulynyń esimi men jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn», delingen jedelhatta.
Qoshtasý rásiminde elimizdiń irgeli bes aımaǵyn basqaryp, táýelsizdiktiń eleń-alań jyldarynda jaýapty mindetter atqarǵan qaıratkerdiń aıshyqty eńbegi, azamattyq bolmysy ulyqtaldy. Úkimet basshysy Álıhan Smaıylov: «Aǵamyz elimizdiń eń sezimtal qurylymdary men aımaqtarynda aıanbaı eńbek etti. «Krızıs menedjeri» atanǵan taý tulǵanyń árbir júıeli, nátıjeli jumysynyń ar jaǵynda bilim men bilik qana emes, úlken júrek jatty. Eldiń órkendep, óristeýine bar ǵumyryn arnaǵan ardaqty azamattyń úlkenge qurmeti, kishige izeti de erekshe edi. Adam retinde de, mansap bıiginde de bar bilgeni men túıgenin keıingi býynǵa úıretip ketti», dedi.
Almaty qalasynyń ákimi Erbolat Dosaev elin súıgen memleketshil tulǵa halqymyzdyń yntymaǵy men bereke-birliginiń arta túsýine kóp eńbek sińirgenin, basshylyq jasaǵan salalardyń zaman talabyna saı damýyna da tyń serpin bergenin aıtty.
«Men Berdibek Mashbekulymen 25 jyldan astam ýaqyt aralyǵynda tanys boldym. Ol kisi túrli salada bar jigerimen jumys istep, 45 jyldan astam ýaqyt memlekettik qyzmette elimizdiń órkendeýine qomaqty úles qosty. Táýelsizdikti nyǵaıtý jolynda qatardaǵy ekonomısten Premer-mınıstrdiń orynbasaryna deıingi laýazymdy qyzmetterdi abyroımen atqardy. Árdaıym jaýapty qyzmettiń tutqasyn ustap, qysyltaıań ýaqytta da júktelgen kúrdeli mindetti tııanaqty oryndap, eldiń seniminen shyǵa bildi», dedi qala ákimi.
– Berdibek shyǵys pen batysta da, qar men sýyqta da ıgi isterdiń basynda júrip halqyna qaltqysyz qyzmet etti. Tek qana basshy bolǵan joq, eldiń arqa súıer aǵasy boldy, úlken qurmet pen syıǵa bólendi. Shynyn aıtqanda, ol kisiniń alǵa qoıǵan jospary áli de kóp edi. Ońtústik Koreıaǵa barar aldynda Almatyǵa kelgende dıdarlasqan edik. Ol 70 jasyn atap ótken joq. Sol joly maǵan: «Bıyl amandyq bolsa kúzde egin jınalyp, halyqtyń kóńili ornyna túsken kezde elge baryp kópten kórmegen týys-týǵan, dos-jarannyń basyn qosyp toı jasasam», degen edi. Onymen qosa uzaq jylǵy tájirıbesi men bilimin jastarǵa úıretip, ýnıversıtette sabaq berýdi oıǵa alǵanyn aıtqan bolatyn. О́zin óte sergek hám qaıratty sezinetin. Allanyń isine shara bar ma? Rýhy shat bolǵaı», dep eske aldy memleket qaıratkeri Ikram Adyrbekov.
Marqummen uzaq jyldar birge qyzmet etken qoǵam qaıratkeri Amalbek Tshanov Berdibek Mashbekulynyń iskerlik qyryna erekshe toqtaldy. «Bekeń shyn máninde óz ultynyń adal perzenti. Ulttyń dúnıetanymy, tabıǵaty, qasıet-qalyby onyń boıynan únemi kórinip turatyn. Táýelsizdik jyldary el aǵalarymen memleket irgesin birge qalasyp, úlken jaýapty betburystardyń basy-qasynda ózi júrdi. Uıymdastyrýshylyq qabileti, adamdarmen til tabysýy erekshe edi. Qazaqta: «Eldiń atyn er shyǵarady, erdiń atyn el shyǵarady» deıtin maqal bar. О́zi basqarǵan ár óńirdiń tynys-tirshiligin tereńnen zerdelep, ekonomıkalyq daǵdarystan aımaqtardy aman alyp shyǵýdyń jan-jaqty joldaryn alǵa ustady. О́z isine adaldyq tanytyp, elge aıanbaı qyzmet etken perzentin qazaq halqy esh ýaqytta esten shyǵarmaıdy dep esepteımin», dedi ol.
Berdibek Mashbekuly Saparbaev 1953 jyly Qyzylorda oblysy Jańaqorǵan aýdanyndaǵy Besaryq aýylynda dúnıege kelgen. 1977 jyly Almaty halyq sharýashylyǵy ınstıtýtyn ekonomıst mamandyǵy boıynsha bitiredi. Eńbek jolyn 16 jasynda «Zadarınskıı» keńsharynda qatardaǵy jumysshy bolyp bastaǵan. 1995-2022 jyldar aralyǵynda elimizdiń bes oblysyna ákim bolǵan. Ol eki ret Qazaqstan Respýblıkasynyń Eńbek jáne halyqty áleýmettik qorǵaý mınıstri, eki ret Premer-mınıstrdiń orynbasary qyzmetin atqardy. Ár jyldary mınıstrler kabıneti apparatynyń jetekshisi, Kedendik baqylaý agenttigi tóraǵasy, Qarjy mınıstriniń orynbasary bolǵan.
Marqum Almatydaǵy «Keńsaı-2» qorymyna jerlendi.
ALMATY