Eger jazýshy oqyrmanyn, sýretshi kórermenin selt etkizip, oı salmasa – ol týyndy ómirsheń bola ala ma? Endeshe, oqyrman osy joly qoǵamnyń kókeıkesti máselelerin sýretimen sóıletetin Sáýle Súleımenovanyń polıetılen, sellofan paketterden jasalǵan «Shyńjańdy tazalaý», «Qandastar týraly dastan» serııasyna qalyń qaǵazǵa balaýyzben basylǵan «I love you», «Sunset Workers», «Kazakh cancan», «Green Bus», «Barakholka» serııasyndaǵy «Bazar Busstop-1» týyndylaryna zer salyp kórińizshi.
О́zindik máneri bar avtor qazirgi tańda suranysqa ıe sýretshilerdiń qatarynda. Sáýleniń týyndylary Sharjah Art Foundation, Alain Servais kolleksııasy, Eýrazııalyq Mádenı Alıans, Á.Qasteev óner murajaıy syndy galereıalarda tur.
Sýretshi shyǵarmashylyǵyndaǵy osynaý ádiske qoǵamnyń Tabıǵat-Anaǵa degen kózqarasy túrtki bolǵan. «Qaıbir jyldary Astana men Almaty arasynda poıyzben jıi saparladym. Jazyq dalamen ári-beri ótkende qyzǵaldaqtar jaıqalǵan mezgildi kórgim keletin. Alaıda onyń ornyna plastık shólmekter men paketterdiń shashylyp jatqanyna ishim ashıtyn. Dala – bizdiń rámizimiz, el maqtanyshy, tipti barlyq jerde plastık qoqys jaırap jatsa da, bárimiz osy darhan dalamyzben maqtanamyz. Sellofan qaltalar jer-kókte ushyp júr, ósip turǵan shópter men aǵashtarǵa jabysyp, jer-jerde shashylyp jatady. Bir qyzyǵy, olar erip, joq bolyp ta ketpeıdi. Mine, bul – kezeńniń derti», deıdi Sáýle Súleımenova.
Sýretshini tolqytqan osyndaı ishki tolǵanystar úni ónerine aýysqan.
«Sellofan paketterdi qalaı paıdalanýǵa bolatynyn oılastyra bastaǵanda, onyń eshteńege de jabyspaıtynyn baıqadym. Ol tek joǵary temperatýrada eritilgende ǵana ekinshi plastıkke jabysady eken. Sondyqtan maǵan jelim pıstolet pen polıgal (qalyń móldir plastıkalyq paraqtar) qoldanýǵa týra keldi. Bir jaǵynan, ol qoqys, biraq onyń múldem joq bolyp ketpeıtinine zer salsaq, plastıkti qymbat metall nemese munaı ónimi, altynmen para-par dep qaraýǵa da bolady. Paketterdiń móldirinen bastap, aq, túrli-tústi kempirqosaq syndy, tipti qara túske deıingi barlyq tústi tabýǵa bolady. Sol sekildi, ondaǵy jarnama mátininde, brend ataýynda jáne basqa da syrtynda basylǵan aqparattarda jazylǵan sózderde neshe túrli oı, paıym bar. Munyń bári týra bizdiń ómirimiz sekildi, qıly-qıly, ashy da tátti, kúlkili de qorqynyshty, ádemi ári suryqsyz», deıdi sýretshi.
S.Súleımenovanyń Astanada ótken «Milestone» atty jeke kórmesin uıymdastyrǵan táýelsiz art-keńesshi Vladıslav Slýdskıı: «Sýretshi 1993 jyldardaǵy jaǵdaı, natıýrmort, gúl, jeke oqıǵadan bastaıdy da, arýaq, Astana-laın, ýrbanızasııa, ótkenimiz ben bolashaǵymyz arqyly saıası, áleýmettik máselelerge oıysady. Onyń «Jumysshylar» degen kartınasyn alyp qarańyzshy. Negizi mundaı taqyrypqa kóp sýretshi bara bermeıdi. «Arýaqtar» degen kartınasyn da jekelegen adamdar men saıasattyń ortasyndaǵy kópir dep esepteımin. Sýretshiniń saıası taqyryptaǵy týyndylaryn kórermen jyly qabyldaıdy. Bir qýanyshtysy, Súleımenova halyqaralyq deńgeıde de joǵary baǵalanyp júr. Dál qazir onyń týyndylary Dıýnkerk qalasyndaǵy FRAC Grand Large – Hauts-de-France murajaıynda tynymal sýretshilerdiń eńbegimen qatar tur», deıdi.
ALMATY