Qymbatshylyq sharyqtap turǵan tusta at shaptyrym aýyl arasyna jetý qarapaıym halyqtyń qaltasyna kádimgideı salmaq salary aıtpasa da túsinikti. Ásirese, Alataýdy baýyrlaı jatqan Esik pen Talǵar qalalarynyń arasyna qatynasýdyń qıyndyǵyn jergilikti turǵyndar sońǵy jyldary aıqyn sezindi. Sebebi eki araǵa júretin qoǵamdyq kólik qatynasy pandemııa kezinde úzilip, jolaýshylar tek taksımen júrýge májbúr bolǵan. Onyń da quny kóterilip, keminde bir baǵytqa jetý baǵasy 300-400 teńgege deıin sharyqtap ketken edi.
Osyndaı qıyndyqtyń kúrmeýin tarqatýda Talǵar aýdanyndaǵy «Tulpar Ekspress-A» jaýapkershiligi shekteýli seriktestigi men Eńbekshiqazaq aýdandyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspeksııasy bólimi ortaq kelisim negizinde irgeles eki aýdannyń ortalyǵyna qatynaıtyn qoǵamdyq kólikti jolǵa shyǵardy.
Bul másele aýdan turǵyndary tarapynan san márte kóterilip keldi. Sol sebepti, qoǵamdyq kóliktiń tapshylyǵyn joıyp, tıimdiligin arttyrý maqsatynda apta basynan beri qaraı 18 oryndy 6 avtobýs Esik – Talǵar – Esik baǵyttary boıynsha jolǵa shyqty. Qoǵamdyq kólikter tańǵy 6:10-nan bastap, keshki saǵat 20:10-ǵa deıin ár 20 mınýt aralyǵynda kestege saı qyzmet kórsetetin bolady. Jolaqysy – 80 teńge. Osy kúni avtobýs aıaldamalary naqtylanyp, arnaıy belgiler qoıylyp jatyr. Halyq sany artyp, soǵan saı qatynas kólemi ulǵaıyp turǵan Talǵar men Eńbekshiqazaq aýdandarynyń turǵyndaryn qoǵamdyq kólikpen qamtamasyz etý máselesi osylaısha ońtaılanyp keledi.
«Jolaýshylarǵa zaman talabyna saı qyzmet kórsetý, jolaqysyn tóleýge yńǵaıly elektrondyq tólem túrlerin engizýde birqatar jumys atqaryldy. Sapa men únemge baǵyttalǵan «AlemPay» elektrondyq júıesi iske qosyldy. Bul – Almaty oblysy boıynsha tuńǵysh júzege asqan joba. Tasymaldaý qyzmetiniń ashyqtyǵyn qamtamasyz etý, salyq túsimderin ulǵaıtý, qoǵamdyq kólik servısiniń sapasyn jaqsartyp, avtobýs baǵyttarynyń tabystylyǵyn taldaý, marshrýttyq jelini josparlaýdy maqsat etken jobanyń tıimdiligi artyp keledi. Talǵar qalasy boıynsha kúnige jeti myńǵa jýyq jolaýshyǵa qyzmet kórsetiledi. Oblysta alǵashqylardyń biri bolyp, sýbsıdııaǵa qol jetkizdik. Sonyń arqasynda jolaýshy tasymaly jandanyp jatyr. О́tken jyly 4 aıǵa oblystyq bıýdjetten 100 mln teńge sýbsıdııa bólinip, ıgerildi. Bıylǵy jylǵa bul baǵytqa 564 mln teńge bólinip otyr. Qoǵamdyq kólikter qalamen qatar, shalǵaıdaǵy Týǵanbaı, Nura, Orman aýyldaryn da qamtydy», dedi «Tulpar-Ekspress-A» kompanııasynyń ıesi, Talǵar aýdandyq máslıhatynyń depýtaty Baýyrjan Áýkenov. Endi mine, Esik pen Talǵar arasyna óz qarjysyna qoǵamdyq kólikterdi júrgize bastady.
Esik qalasy turǵyndarynyń endigi tilegi – qalaishilik marshrýttardyń qaıta qalpyna kelip, iske qosylýy. Atalǵan kompanııa basshylyǵy bul talap-tilekterdi de aıaqsyz qaldyrmaýǵa ýáde berip otyr.
Almaty oblysy