Abaı oblysyndaǵy alapat órtti sóndirý jumystary 3 baǵytta jalǵasyp jatyr, dep habarlaıdy Egemen.kz.
Qaısar órt sóndirýshilerdiń qyzyl jalynmen arpalysyp jatqanyna 6 kún ótti. Áıtse de birneshe kún boıy soǵyp jatqan ekpindi jel tilsiz jaýdy aýyzdyqtaýǵa kedergi bolyp tur. Osy tusta jalyn oshaqtaryna tartylǵan órt sóndirýshilerdiń qatary taǵy 300-ge tarta qutqarýshymen tolyqty. Qazirgi ýaqytta otty aýyzdyqtaýǵa 1 800-den astam adam, 350-ge jýyq tehnıka men 15 tikushaq jumyldyryldy.
«Habar 24» arnasyna suhbat bergen órt sóndirýshiler Astanadan 12 adam járdemdesýge kelgenin aıtty.
«Túnde jalyn qyzaryp kórinip turady. Jeldiń ekpini báseńdegende otty aýyzdyqtaımyz. Biraq kúndiz qaıtadan jel kóterip alady», dedi órt sóndirýshi Aıdyn Esemanov.
Qazirgi ýaqytta jaqyn mańdaǵy eldi mekenderge qaýip tónip turǵan joq. Pılotsyz ushý apparatyn paıdalanǵan qutqarýshylar tilsiz jaý Qashtaq ormanshylyǵynan Semeı qalasyna qaraı baǵyt alǵanyn anyqtaǵan. Jedel is-qımyldar men qabyldanǵan sharalardyń arqasynda bul jalyn tez arada oqshaýlandy.
«Tańǵy saǵat 04:00-te shyǵamyz, Túngi 3-4-ke deıin ormandy aralap júremiz. Árqaısymyzdy ýchaskelerge bólip tastaǵan, sol aımaqtarda tutanǵan jalynmen kúresemiz», deıdi órt sóndirýshiler.