Medısına qyzmetkerleri kúni qarsańynda QR PIB MO aýrýhanasy naýqastarǵa tegin dárigerlik qabyldaý uıymdastyryp, ashyq esik kúnin ótkizdi, dep habarlaıdy Egemen.kz.
Aýrýhananyń bilikti dárigerlerine qaralýǵa kelgen halyqtyń legi az bolmady. Terapevtik jáne hırýrgııalyq beıindegi 16 dárigerge neırohırýrg, revmotolog, nefrolog dárigerleri qosymsha kómekke keldi. Dáriger qabyldaýyna kezegin kútken naýqastar aýrýhanadan shyǵarý qaǵazy, taldaý qorytyndylary men sońǵy ÝDZ/MRT sýretterin kórsetip, dárigerge óz shaǵymdaryn aıtyp úlgerýi úshin ashyq esik kúniniń ýaqyty da uzartyldy.
«Aýrýhana ujymy myqty dárigerlerimen eshqandaı aqysyz kezdesip, tolyqqandy tekserilýden ótýge múmkindik berip otyr. «Ashyq esik kúni» aksııasynyń bolatynyn estip, ortopedtiń qabyldaýyna keldim. Meni mazalaǵan máselege qatysty barlyq suraqqa kásibı jaýap ala aldym. Kelgen kisiniń bári óz kezegin sabyrmen kútip, alǵyspen shyǵyp jatyr», dedi ashyq esik kúnine barǵan Álııa Nysanbaeva.
Ashyq esik kúninde otorınolarıngolog, hırýrg, travmatolog-ortoped, ýrolog, kardıohırýrg, neırohırýrg, akýsher-gınekolog, arıtmolog, pýlmonolog, revmatolog, terapevt, nefrolog dárigerlerine barlyǵy 307 naýqas qaraldy.
«Ashyq esik kúnin uıymdastyrǵandaryńyzǵa alǵysymdy bildiremin. Buny dástúrge aınaldyrsańyzdar jaqsy bolar edi. Men kardıohırýrgtyń qabyldaýynda boldym, óte salmaqty, bastysy bilikti dáriger eken, densaýlyǵyma qatysty asa qundy konsýltasııa berdi. Kásibı mamandardyń kómegine rıza bolyp qaıttym», dedi Astana turǵyny Maqsat Musabekov.
QR PIB MO aýrýhanasynyń dárigerleri men medbıkeleri is-sharaǵa belsendi qatysyp, ár kelýshige jeke iltıpat kórsetti. Halyqqa óz densaýlyqtaryna kóńil bólip, bilikti mamandardyń keńesin alýǵa múmkindik syılaǵan shara áli de jalǵasyn tabýy yqtımal.