«Zhambyl Economic and Investment Forum – 2023» halyqaralyq ınvestısııalyq forýmy Jambyl oblysynda kóptegen jańa bastamany júzege asyrýǵa múmkindik týǵyzyp otyr. Atalǵan forým aıasynda ashylǵan gofrlengen karton jáne tastan jasalatyn daıyn qaǵaz qaptama óndirý zaýyty óńir ekonomıkasyna tyń serpin beretini anyq.
Baızaq aýdanyna qarasty Qostóbe aýylynda ashylǵan jańa kásiporynnyń jobalyq quny 1,7 mıllıard teńgeni quraıdy. Derekterge sensek, zaýyt jylyna 12 myń tonna ónim óndirýge qaýqarly eken. «KazStoneBox» JShS-nyń gofrlengen karton óndirý zaýyty sońǵy nusqadaǵy avtomattandyrylǵan qondyrǵylarmen jabdyqtalǵanyn da aıta ketken lázim. Qysqasy, irgesi jańadan qalanǵan óndiris oshaǵynda qyzmetkerlerdiń erinbeı eńbektenýine barlyq múmkindik qarastyrylǵan.
Jańadan ashylǵan óndiris ornynyń basshysy Berik Úmitqalıevtiń aıtýynsha, mıneraldy shıkizattan jasalǵan qaptama shyǵaratyn kásiporyn postkeńestik elderde balamasy joq shıkizat retinde mıneraldy kalsıı karbonatyn paıdalanatyn biregeı óndiris orny bolyp otyr.
«Qaǵaz baǵasy jyl ótken saıyn sharyqtap bara jatqanyn kórip otyrmyz. Qaǵaz óndirisine bilek túre kirisken zaýyttar álem elderinde de sırek kezdesedi. Bizdiń seriktestik óndiretin ónimniń 75 paıyzy tastan jasalatynyn aıta ketken lázim.
Irgedegi Qarataý qalasynan tasymaldanatyn tasty aldymen arnaıy apparatpen ýaq qylyp alamyz. Odan keıin polıetılen, polıprofılen qospasyn aralastyryp, tıisti qurylǵylarǵa salyp qaǵaz daıyndaýǵa kóshemiz. Kásiporyn óndirgen ónim sýǵa, ylǵalǵa tózimdi bolýymen aıryqshalanatynyn aıta ketken lázim. Seriktestikte búgingi tańda qyryqtan astam azamat turaqty jumyspen qamtylyp otyr. Olardyń tynbaı eńbektenýi úshin basshylyq tarapynan barlyq jaǵdaı jasalǵan. Qyzmetkerler tegin túski aspen qamtylǵan. Olarǵa arnalǵan arnaıy ashana da bar», deıdi kásiporyn basshysy Berik Úmitqalıev.
Seriktestik basshysynyń aıtýynsha, Qytaıdan ákelingen jańa qurylǵylardy qalaı paıdalaný kerektigin bilikti mamandar jergilikti jumysshylarǵa barynsha úıretip jatyr. Endi olar jumysqa belsene kirisip, zaýyt isin ilgeriletýge kúsh salmaq.
Kásiporyn óndirgen ónim Túrkistan, Almaty oblystaryna jóneltiledi. Sondaı-aq kórshiles О́zbekstan eline eksportqa shyǵarylatyn bolady. Qysqasy, jańadan ashylǵan zaýyt ónimine degen suranys qazirdiń ózinde az emes.
«Qandaıda bir isti qolǵa almas buryn bilikti mamandardyń keńesine qulaq túrgenniń esh artyqtyǵy joq. Birshama ýaqyt buryn qytaılyq áriptesim Iаn Na degen azamattan jumysty júrgizýdiń joldaryn surap, jańa bastamanyń qyr-syryna tereńinen qanyqtym.
Osy bir kásipti qolǵa alyp otyrǵan ózge elderdegi kásiporyndardyń jumysyn da hal-qaderimshe zerdeledim. Nátıjesinde, 2021 jyly nesıe rásimdep, jańa bir isti qolǵa alǵan jaıym bar», deıdi kásipker ótken shaqqa kóz júgirtip.
Seriktestik basshysy qolǵa alǵan isti ári qaraı órkendetýdi maqsat tutyp otyr. Ol zaýyttan óndirilgen ónimdi Qazaqstan men О́zbekstan aýmaǵynan tys ózge de memleketterge eksporttaǵysy keledi. Aldaǵy ýaqytta osy baǵyttaǵy jumysty shırata túspek.
Zaýyt basshysy áýelde 10 myń tonna kóleminde ónim óndirse, keıingi jyldary kórsetkishti birneshe esege arttyrýǵa bekinip otyrǵany qýantady. Onyń aıtýynsha, kásiporyn qyzmetkerleriniń tabandy eńbeginiń arqasynda zaýyt óndiretin ónim aldaǵy birneshe jyldyń bederinde 20-30 myń tonnaǵa deıin jetkizilmekshi. О́ıtkeni ónimge degen suranys jyl ótken saıyn artyp keledi.
Jambyl oblysy,
Baızaq aýdany