Tennısten álemdik reıtıngte 296-orynda turǵan Mıhaıl Kýkýshkın AQSh-tyń Taıler qalasynda máresine jetken «Chellendjer» týrnıriniń fınalynda jeńilip qaldy.
Jerlesimiz muhıttyń arǵy betindegi dodanyń fınalynda álemniń 187, osy jarystyń 3-raketkashysy retinde tirkelgen amerıkalyq Nıkolas Moreno De Alboranmen sheberlik baıqasty. Bas júlde úshin ótken básekeniń birinshi partııasynda Kýkýshkın taı-breıkte sátti oınap, alǵashqy setti óz paıdasyna aıaqtady – 7:6 (10:8). Ekinshi set te taı-breıkke deıin jalǵasyp, bul joly amerıkalyq tennısshiniń mereıi ústem boldy – 7:6 (7:0). Al úshinshi, sheshýshi partııada esep 5:4 bolǵan mezette amerıkalyq tennısshi breık jasap, matchty 6:4 esebimen túıindedi.
Osylaısha, amerıkalyq Nıkolas Moreno De Alboran bir aptanyń ishinde eki jerlesimizben kezdesip, ekeýin de qapy qaldyrdy. Nıkolas Moreno osydan bir apta buryn Lıttl-Rok qalasyndaǵy dodada Beıbit Juqaevty asa tartysty matchta 6:2, 6:7 (1:7), 7:6 (7:5) esebimen jeńip ketken edi.