«Kadr bárin sheshedi» deıtin támsil burynnan bar. Osy qaǵıdany ustanatyn qazirgi jumys berýshiler aldymen mamannyń biliktiligine nazar aýdarady. Ásirese munaı-gaz ónerkásibi keń qanat jaıǵan Atyraý oblysyndaǵy kásiporyndarǵa jumysqa ornalasý ońaı emes. Sol sebepten óńirde mamandardy táýelsiz sertıfıkattaý júıesin engizý qolǵa alynǵan.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, pılottyq jobany «Edil-Oral.kz» seriktestigi iske asyrady. Osy maqsatta bıylǵy aqpanda táýelsiz sertıfıkattaý júıesin engizý úshin Eńbek jáne halyqty áleýmettik qorǵaý, Ǵylym jáne joǵary bilim, Oqý-aǵartý mınıstrlikteri, Atyraý oblysynyń ákimdigi men «Edil-Oral.kz» JShS arasynda yntymaqtastyq pen ózara is-qımyl týraly kelisimge qol qoıyldy. Osyǵan oraı atalǵan seriktestik ókilderi 16 mamandyqty sertıfıkattaýdy usynyp otyr. Qazir mamandardyń biliktiligin arttyratyn oqý oryndary anyqtalyp, seriktes bolatyn jumys berýshiler belgilendi.
– Kadrlardy táýelsiz sertıfıkattaý júıesin engizýmen qatar, «Bilim berý júıesinde kásiptik standarttardy qoldaný» jobasy da qanatqaqty rejimde iske asady. Osyǵan oraı birlesken jumys toby qurylyp otyr. Al qanatqaqty joba iske qosylǵannan keıin «Edil-Oral» seriktestigine óndiristik mekemelerdiń jumysshylary men kásiptik bilimi bar jumyssyzdar ótinim bere alady. О́tinim bergender sertıfıkattaý boıynsha qosymsha bilim alady. Osydan keıin olardyń, kásibı daǵdysy naqtylanyp, táýelsiz sertıfıkatqa ıe bolady. Bul óńirde joǵary sanattaǵy jumysshylar qatary artyp, halyqaralyq deńgeıdegi sertıfıkatty ıelenýine yqpal etedi, – deıdi Azamat Mámbetov.
Munaıly óńirde jumyssyzdar qataryn azaıtýǵa yqpal etetin taǵy bir joba iske asyrylyp jatyr. Bul – «Kúmis jas» jobasy. Jyl sońyna deıin atalǵan jobamen 600 adamdy jumyspen qamtý kózdelip otyr.
– Bıylǵa deıin «Kúmis jas» jobasyna 58 jastan asqandar ǵana qatysatyn edi. Endi salalyq mınıstrlik turǵyndar arasyndaǵy jumyssyzdyq deńgeıin saraptap, jobaǵa qatysýshylardyń shekti mólsherin 50 jasqa deıin tómendetti. Bul ártúrli sebeppen jumysynan bosap, tabyssyz qalǵan jandar úshin tıimdi bolyp otyr. Baǵdarlamanyń jumysqa ornalasýshy úshin de, jumys berýshi úshin de tıimdiligi bar. О́ıtkeni osy baǵdarlamaǵa qatysýshynyń jalaqysyn memleket sýbsıdııalaıdy, – dep túsindirdi Azamat Mámbetov.
Onyń aıtýynsha, «Kúmis jas» jobasyna qatysý merzimi 36 aıdan aspaıdy. Jalaqy 30 aılyq eseptik kórsetkish mólsherin quraıdy. Joba sheńberinde jumysqa ornalasqandar úshin sýbsıdııa mólsheri de ártúrli bolyp belgilengen. Máselen, jumysshynyń alǵashqy 12 aıdaǵy jalaqy mólsherlemesiniń sýbsıdııasy – 70%. Al 13-24 aıǵa deıingi aralyqta 65%, sońǵy 12 aıda 60% mólsherinde sýbsıdııa beriledi.
– Atyraý oblysynda «Kúmis jas» jobasymen 343 adam jumysqa qabyldandy. Ásirese, Jylyoı jáne Inder aýdanynyń sharýagerleri atalǵan jobany tıimdi paıdalanyp otyr. Qazir Atyraý qalasynda 112, Jylyoı men Inder aýdanynda 46, Qurmanǵazyda – 18, Qyzylqoǵada – 38, Maqatta – 25, Mahambet aýdanynda 29 adam «Kúmis jas» jobasymen jumysqa ornalasty. Olarǵa zeınetaqy tólemi aýdarylady, – dep málim etti basqarma basshysy.
Atyraý oblysy