Komandırlerdiń tájirıbe alańy

Polıgon aýmaǵynda áske­rı qyzmetshilerdiń kásibı biliktiligin arttyryp, sheberlik­terin shyńdaýdy maqsat tutqan oqý-jattyǵý jıyny úsh kúnge sozylyp, jaýyngerler ózara tájirıbe almasty.

– Oqý-jattyǵý jıyny barysynda bólim komandırleri men olardyń orynbasarlary brondy tronsporter tehnıka­syn júrgizý, sýda jýzý, ártúrli modıfıkasııadaǵy qarý-jaraq­pen oq atý sabaqtaryn ótti. Búginde olar óte jaqsy nátıje kórsetip jatyr, – dedi 5511 áskerı bólim komandıriniń qarý-jaraq jónindegi orynbasary, maıor Abror Abdýllaev.

Qýatty qarýmen jabdyq­talǵan BTR-80 – sońǵy úl­gide jańartylǵan tehnıka. Jol talǵa­maıtyn kólik oıly-qyrly jerlermen de, sýda da júre beredi. Ony keńes áskerleri Aýǵan soǵy­synda qoldanǵan. Keıin 90-jyl­dardan bastap Reseı Qa­rýly kúshteriniń jáne basqa da birqatar burynǵy keńestik respýblıkanyń barlyq iri qa­rýly qaqtyǵystarynda óziniń tıim­diligin kórsetken. Ony júr­gizý de ekiniń biriniń qolynan kele bermeıdi.

– Qazirgi ýaqytta BTR-80-di sýda júrgizý úshin prak­tıkalyq sabaqtar bolyp ja­tyr. Bul tehnıka aldynan kezik­ken shuń­qyr ǵana emes, ózen sekil­di keder­gilerdi de ońaı eńse­redi. Sýǵa túspes buryn ony jaq­sylap tekserip, barlyq lıýk­terdi jabý kerek, – deıdi 5518 áskerı bóliminiń aǵa mehanık júrgi­zýshisi, serjant Rýslan Bekenov.

Oqý-jattyǵý jıyny barysynda áskerı qyzmetshilerge barlyq jaǵdaı jasalǵan. Tipti oqý-jattyǵýdan keıin tynystaý úshin arnaıy demalatyn oryndarmen jabdyqtalǵan tehnıkalar da bar. Áskerı kóliktiń ishi keń ári barlyq zaman talabyna saı jasaqtalǵan.

– Bul jıynnyń áskerı qyz­met­shilerdiń ózara tájirıbe almasýlary úshin mańyzy zor. Biz osynda kelip, ózimizge kóp paıdaly bilim aldyq. Jańa mashyq­tardy meńgerdik. Kúndelikti qyzmette júrgende onyń bárine kóńil bólýge múmkindik bola bermeıdi. Al myna jerde bar nazarymyzdy osyǵan aýdaramyz, – deıdi 5518 áskerı bóliminiń komandıri, podpolkovnık Medet Ertaılaqov.