Medısına salasynyń san salaly satysynan ótip, mamandyqtyń qyr-syryn jetik meńgergen tájirıbeli maman qaı kezde de qadirli emes pe? Ásirese el egemendiginiń eleń-alańyndaǵy qıyn-qystaý shaqtarda, shyńdalǵan sala mamandary búginde el aǵasy bolyp, jastarǵa baǵyt-baǵdar kórsetip keledi. Joǵary sanatty hırýrg-dáriger Baǵdat Alataev ta óziniń kúndelikti qarbalas jumysynan bos ýaqyt taýyp, jastarǵa bilgen-túıgenin úıretýden áste bir jalyqqan emes.
Ol Jambyl oblysynyń Shý aýdanyna qarasty Belbasar aýylynda týyp, bala kez, balań shaǵynan medısına salasynyń mamany bolýdy armandady. Keıipkerimiz sol armannyń ıirimimen 1990 jyly mektep bitirgennen keıin S.J. Asfendııarov atyndaǵy Qazaq ulttyq medısına ýnıversıtetine oqýǵa túsedi. Sodan sol bir kıeli shańyraqty 1996 jyly emdeý isi mamandyǵy boıynsha bitirip shyǵady.
– Qarapaıym sharýa otbasynan shyqsaq ta, bala kezimizden medısına salasyna barýǵa yntaly boldyq. Qalaýymyz oryndalyp, biz oqýǵa túsken jyly oqý ornynda qazaq bólimi ashyldy. Egemendiktiń lebin sezgendeı boldyq. Qarap otyrsaq, sol tusta qazaq fakýltetiniń alǵashqy qarlyǵashtary – biz, bizdiń qatarlastarymyz eken. 1994 jyldan Almaty klınıkalyq shuǵyl kómek kórsetý aýrýhanasynyń hırýrgııa bólimshesinde orta býyn mamany bolyp jumys istedim. Sonda jaı júrmeı dárigerlerden tálim alyp, shama-sharqymyzsha tájirıbe jınaqtadyq. Eńbek jolymyzda ustazdyq etken aǵa áriptesterge alǵys aıtamyz. Aýdandyq aýrýhanada bólim meńgerýshisi bolǵan Álibek Sádýaqasov syndy bilikti mamandardan úırengenimiz kóp. Qazir de úırenýden qol úzgenimiz joq, – dep ótken shaqty eske aldy dáriger.
1996 jyly oqýyn támamdaǵan soń Baǵdat Alataev Almaty oblysy Ile aýdandyq ortalyq aýrýhanasynda dáriger-hırýrg bolyp jumysyn bastady. Bilikti hırýrgterdi torýyldap júretin jastardy kim jek kórsin? Baǵdat Alataevtyń ózi de eńbek jolyn medısınanyń kishi qyzmetinen bastaǵanyn úlken olja dep esepteıdi. Ol Astanaǵa 2004 jyly qonys aýdarǵanda Selınograd aımaqtyq klınıkalyq aýrýhanasyna jumysqa qabyldanǵan. Bul – qazirgi oblystyq №2 aýrýhana. Mundaǵy dárigerler qazir de oblys tóńiregindegi 7 aýyldyq eldi mekenge kópsalaly hırýrgııalyq kómek kórsetedi. Baǵdat Alataev osy aýrýhanada bıyl naýryzǵa deıin taban aýdarmaı eńbek etti. Onyń 9 jylynda hırýrgııa bóliminiń meńgerýshisi boldy. Jumys qaýyrt. Oblys tóńiregindegi aımaqtarǵa shuǵyl shaqyrtý tússe, dárigerler lezde jıylyp, sanavıasııamen hırýrgııalyq kómek kórsetýge shyǵady.
– Shalǵaı aýyldarǵa kúrdeli operasııalar kezinde baratynbyz. Kúndiz, tún degen joq, kez kelgen ýaqytta shaqyrady. Qazir de úıreneıik, bileıik degen nıetpen Respýblıkalyq dıagnostıkalyq ortalyǵynyń jýyrda ashylǵan kópsalaly hırýrgııa bólimshesinde dáriger-hırýrg bolyp aýysyp, sonda eńbek etemin. Keıde, salaǵa kelip jatqan jastarǵa qarap, ózimizdiń bozbala kezimiz eriksiz eske túsedi. Biraq «Ustazdan shákirt ozar» degen bar. О́zimiz de biraz shákirtke bilgenimizdi úıretip, belin býdyq. Negizi, ózimniń jumysymnan tys ýaqytta Astana medısınalyq ýnıversıtetinde jalpy hırýrgııa páninen sabaq beremin. Bilim salasyna aralasqanymyzǵa da 15 jylǵa jýyqtapty. О́zimiz sabaq bergen shákirtterdiń birqatary qazir jaqsy qyzmette júr. Menińshe, hırýrg bolý úshin talap pen talant, ıntýısııa kerek. Osy úsh keregi túgel adamnan myqty dáriger shyǵady túbinde. Dáriger bolǵan soń ómirińniń sońyna deıin oqyp, izdenesiń. Kúnnen-kúnge medısınaǵa jańa tehnologııalar qosylyp jatady. Biraq bul burynǵy, dástúrli ádisterdi qoldanbaý kerek degen sóz emes. Sebebi operasııa barysynda túrli keleńsiz jaǵdaılar bolmaıtynyna eshkim kepildik bere almaıdy. Sonda dástúrli ádiske kóshýge týra keletin sátter týýy múmkin. О́kshemizdi basyp kele jatqan izbasar jastarǵa da aıtarym osy, medısına salasyn tańdaǵan soń úırenýden qashpaý kerek. Tájirıbe eshqashan artyq bolmaıdy, – dep jastarǵa keńesin aıtty B.Alataev.
Bilikti dárigerdiń aıtýynsha, operasııanyń jeńili bolmaıdy. Sondyqtan hırýrgter ár operasııaǵa oıyn jınaqtap kirip, barynsha salqynqandylyq tanytady. Kúmándanýǵa taǵy bolmaıdy. Bul dárigerlerdiń ózge saladaǵy mamandardan basty artyqshylyǵy desek te bolatyn shyǵar.