Aqmola oblysy, Kókshetaý qalasynyń ıppodromynda jamby atý (at ústindegi sadaq atý) men teńge ilýden jasóspirimder, jastar, eresekter arasyndaǵy el chempıonaty ótip jatyr, dep habarlaıdy Egemen.kz.
Chempıonat aıasynda QR jamby atý federasııasy kezekten tys konferensııa ótkizdi. Konferensııa barysynda federasııa ujymy elimizdegi jamby atý salasyndaǵy mamandar men sportshylarǵa 2023-2027 jyldarǵa arnalǵan damý baǵdarlamasyn tanystyrdy.
Jamby atý resmı ulttyq sport retinde kesh damyǵan sport túri (2014 jyly tirkelgen). Sol sebepti de qabyldanǵan strategııalyq baǵdarlama arqyly at ústinde sadaq atý ónerin halyqaralyq arenada damytýǵa jol ashpaq.
Sondaı-aq konferensııada 2024 jyly ótetin V Dúnıejúzilik kóshpendiler oıyndaryna daıyndyq máselesi pysyqtaldy. Federasııa prezıdenti Erkebulan Ilıasov («AlageumGroup» JShS bas dırektory) bapkerler men sportshylardy jigerlendirý maqsatynda DKO-da úzdik óner kórsetken sportshyǵa páter, bapkerine qarjylaı syılyq beretinin aıtty.
Elimizde sportshylarǵa sadaq daıyndaıtyn arnaıy óndiris orny joq, osy másele de aldaǵy ýaqytta sheshimin taýyp, mergender óz elimizde óndirilgen zamanýı sadaqtarmen óner kórsetetin bolady.
Atalǵan konferensııaǵa jamby atý sportyn damytýǵa atsalysatyn Ulttyq jáne at sporty túrleri ortalyǵy dırektory Baqdáýlet Sábıtov, QR ulttyq sport qaýymdastyǵynyń bas hatshysy Tastanbek Esentaev ta qatysyp, óz taraptarynan barynsha qoldaý kórsetetinin aıtty.
Atalǵan el chempıonaty 23 maýsymǵa deıin jalǵasady.