Qostanaı oblystyq tarıhı-ólketaný mýzeıinde turǵan kalıbri 25 mm, salmaǵy 7 kılo bolatyn uzyn myltyqty 1981 jyly I.Krasnoborodıkov degen kisi tapsyrypty. Janyndaǵy kishiregi – Amangeldi batyrdyń senimdi serigi, Torǵaıdaǵy ult-azattyq kóterilisiniń myńbasy sardary bolǵan Ybyraı Atambektiń myltyǵy.
Murajaıǵa I.Krasnoborodıkov tapsyrǵan qarý kúldirmamaı myltyq bolýy múmkin. «Kúldirmamaıdyń uńǵysy uzyn keledi. Alysqa atýǵa arnalǵan myltyq. Aýzynan oqtalyp, pilte arqyly ot alady. Kúldirmamaıdyń atar kezde jerge tirep qoıatyn jınamaly sıraǵy bolady. El aýzynda Kenesary Aqmola bekinisin qorshaǵan kezde qalanyń syrtynda turyp osy kúldirmamaı myltyqpen qamaldaǵy zeńbirekshini atyp túsirgen degen sóz bar. Kene hannyń myltyǵy qazir Ombynyń ólkelik tarıhı-ádebı murajaıynda saqtaýly tur. Bul myltyqtyń kóshirmesin qolóner sheberi Tańat Álibaev jasap shyǵardy, – deıdi aqyn Batyrlan Saǵyntaev.
Áleýmettik jelide kúldirmamaıdyń oqpanyn súmbimen tazalap turǵan dala jaýyngeriniń sýreti júr. Sýrettiń tómengi oń jaq tusynda «K.Ahmetjanov» degen jazý bar. Bul – sýretshi, etnograf-qarýtanýshy Qalıolla Ahmetjannyń jańǵyrtqan týyndysy.
Mýzeı qyzmetkerleriniń aıtýynsha, munda turǵan kúldirmamaıdyń uńǵysy tegis, súmbiniń kómegimen oqpanynan oqtalady. Uzyn sılındr tárizdes metall oqpany arnaıy joǵary sapaly quryshtan quıylǵan.
Qostanaı oblysy