Elimizdiń áleýmettik-ekonomıkalyq damýyn ilgeriletip, halyqqa minsiz qyzmet etýdi maqsat etken memlekettik qyzmetshilerdiń kásibı merekesi qarsańynda Almaty óńirinde alǵash ret «Dástúrden taǵylym» atty oblystyq baıqaý uıymdastyryldy.
Is-sharanyń maqsaty – mádenı-tarıhı qundylyqtardy keńinen nasıhattaý arqyly ulttyq biregeılikti aıqyndaıtyn adamgershilik baǵdarlardy dáripteý jáne qalyptastyrý. Memlekettik qyzmettiń qulaǵynda júrgen jas mamandardyń bilimi men biliktiligi sarapqa salynǵan is-sharaǵa Memlekettik qyzmet ister agenttiginiń Almaty oblysy boıynsha departamenti jáne Almaty oblysy ishki saıasat basqarmasy men Almaty oblysy jastar resýrstyq ortalyǵy uıytqy boldy. Básekeli baıqaýǵa 12 komanda qatysty.
Taý etegindegi «Ǵun» etnoaýylynda ótken baıqaý shartyna saı, ár aýdannan at arytyp jetken memlekettik qyzmetshilerden quralǵan komandalar tórt kezeń boıynsha bilim-biliktiligin baıqatyp, kúsh-jigerlerin synǵa saldy. Baıqaýdyń shymyldyǵyn ashqan «О́nerliniń órisi keń» atty alǵashqy kezeńde qatysýshylar ózderin tanystyra kelip, án salyp, bı bılep, boıda bar ónerlerin pash etti. Al ekinshi «Tolaǵaı» sporttyq kezeńinde júgirý men sekirýden turatyn birneshe estafetalyq jarys uıymdastyryldy. О́ner men sporttyq jarystardan soń memlekettik qyzmettegi áıelder ulttyq taǵam túrlerin, atap aıtqanda, býyn burqyrata baýyrsaq pisirý, ıin qandyra qamyr ıleý, qurt jasaýdaǵy sheberlikterin kórsetse, er-azamattar at erttep, qoshqar kóterýde tolaǵaı kúsh ıeleri ekenin tanytty. Tartysqa toly tórtinshi kezeńde tarıh pen mádenıet, salt-dástúrge qatysty tanym kókjıegin tanytqan vıktorınalyq suraqtarǵa jaýap berýdegi tapqyrlyqtary tarazylandy.
Memlekettik qyzmetker memlekettiń aınasy ekenin aıqyndaǵan baıqaý barysynda memlekettik qyzmetshiniń boıyndaǵy qasıetter men mindetter kórinis taýyp, is-sharanyń mazmunyn asha tústi.
Sonymen memlekettik qyzmet ete júrip, otbasy qundylyǵyn arttyryp, salt-dástúrdi dáriptegen «Dástúrden taǵylym» baıqaýynyń qorytyndysy boıynsha birinshi oryndy Talǵar aýdanynyń «Qazyna» komandasy jeńip alyp, 200 myń teńge syılyqqa ıe boldy. Al ekinshi oryndy Kegen aýdanynyń «Kólsaı» komandasy utyp alsa, úshinshi orynǵa Uıǵyr aýdanynyń «Qaradala qyrandary» atty komandasy turaqtap, qarjylaı syılyqtardy qanjyǵasyna baılady.
Jeńimpaz komandalardy quttyqtaǵan Memlekettik qyzmet ister agenttiginiń Almaty oblysy boıynsha departament basshysy Lázzat Muqataıqyzy memlekettik qyzmetshilerdiń búgingi róli men jaýapkershiligin ataı kele, el damýyna qosyp júrgen eńbekteriniń abyroıly bolýyna tilektestigin bildirdi.
«Almaty oblysynda memlekettik qyzmetshilerdiń shtat sany 4 152 bolsa, osy kúni bul baǵytta 3 709 memlekettik qyzmetshi eńbek etip keledi. Olardyń 50 paıyzyn áıelder quraıdy, olardyń orta jasy – 39. Memlekettik qyzmetshilerdiń 94 paıyzy joǵary bilimdi», deıdi Lázzat Muqataıqyzy.
Almaty oblysy